Елімізде арқа омыртқасы жарығымен туылған балаларға көмек қажет. Медицинада «Spina Bifida» деген атауға ие бұл дерттің емі жоқтың қасы. Дәрігерлер оның әлі де зерттелуі қажет екенін айтады. Ал ресми есепке жүгінсек, мұндай аурумен Қазақстанда жылына 50-ден астам сәби туылады екен. Таяуда балалары осындай дертке шалдыққан аналар қоғамдық бірлестік құрды. Ондағы мақсат - демеушілер тартып, аурудың емделу жолын кеңейту. Тақырыпты тілші тарқатады.
4 жасар Ерхан өз еркімен жүре алмайды. Балғын арқа ормыртқасынының жарығымен туылған. Медицинада бұл «Spina Bifida» деген атауға ие дерт. Оның орталық жүйке жүйесіне біршама келтірер зақымы бар. Айгүл Бектаева ұлына осымен қатарынан 2 операция жасатып отыр.
Айгүл Бектаева, Ерханның анасы:
Грыжа туылғанда омыртқасында ашық болды. Ішінде жұлындары көрініп тұрады. 4 жылдың ішінде сол грыжасына ота жасалды. Басы гидроцифалия. Басқа су жиналады. Ол сол омыртқа ақауынан кейінгі қосымша симптом.
Оның үстіне отандық медицинада бұл дерттің емделу жолы да әлі нақты түзіле қоймапты. Дәгірлер оның зерттелуі қажет ететінін айтады. Себебі дерттің түзілуіне түрлі фактордың әсері бар. Мәселен, жүктілік кезінде ананың инфекцияға шалдығуы немесе экологияның да салдары болуы мүмкін.
Ардақ Айнақұлов, балалар уролог-трансплантологі:
Урологиялық жағынан айтсақ, бұл - қуықтың нерогенді дисфунциясы. Яғни қуықтың өзгерістеріне әкеліп соғады. Жалпы Қазақстанда жылына 50-60 бала осындай аурумен дүниеге келеді.
Десе де қазір отандық дәрігерлер омыртқадағы ісікті бала туылған сәтте-ақ операциялық жолмен алып тастауға дағдыланып жатыр. Әрі кешенді емдеу жолын ұсынады. Соның бірі - ботокс-терапия.
Бақытжан Майлыбаев, «Ана мен бала ұлттық ғылыми орталығы» АҚ бас ғылыми қызметкері, балалар урологы:
Ботокс-терапия - бұл қуық жолдарына эндоскопиялық әдіспен ботокс препараттарын енгізу болып табылады. Ол қуық жолындағы тырысқан бұлшық еттерді босатады.
Үздіксіз емделуді қажет ететін бұл дертен айыға қою да әсте қиын. Тіпті мүмкін емес деседі. Бірақ Айгүлдің берілгісі жоқ. Сондықтан таяуда елде баласы «Spina Bifida»-ға шалдыққан аналардың бас біріктіріп, ұйым құрғаны бар. Әзірге Қазақстан бойынша 60 адам тіркелген.
Арайлым Құмаржанова, «SPINA BIFIDA» қоғамдық бірлестігінің төрайымы:
«Spina Bifida» бірлестігі баласы мүгедек аналардың бастамасымен құрылып отыр. Мақсатымыз - туабітті дертке шалдыққан балғындарға жан-жақты көмек беру. Демеушілер тартып, олардың сырт елдерде емделгенін қалаймыз.
Бір қызығы, мұндай ауруға шалдыққан балалардың басым бөлігі өте зерек келеді екен. Мәселен, 4 жастағы Ерхан Абайдың, Ыбырайдың өлеңдерін жатқа біледі.
Құралай ПИОНЕР