Қарағанды облысында Қарқаралы ауданына қарасты Қарағайлы кентінің тұрғындары кәріздің тазартылған суын Талды өзеніне ағызуға қарсы шықты. Қарағайлыда кешікпей жаңа тазарту қондырғысы іске қосылмақ. Ал одан аққан су далаға емес тұп- тұнық ағын суға құйылмақ. Оны білген тұрғындар Қарқаралы аудандық әкімдігі мен құрылыс бөлімін сотқа берді.
Сотта белгілі болғаны, кәріз суын тазарту қондырғысы 2 жылдан бері салынып жатыр. Жоба құны 4 млрд теңгеден асады. Бүгінде құрылыстың 90 пайызы аяқталған. Нысан кешікпей іске қосылады. Тұрғындар қоғамдық тыңдауда құбырлардың тартылуына келіскен. Алайда тазартылған 3-інші сұрыпты судың суы мөлдір өзенге ағызылатынын ешкім айтпапты. Енді кенттегі өзен ластана ма деп қапалы. Өйткені, ағын судан мал суарады, балалар шомылады. Оның үстіне ауыз су құбыры да осы маңайдан өтеді.
ТӨЛЕГЕН ЕГІЗБАЕВ, ҚАРАҒАЙЛЫ КЕНТІНІҢ ТҰРҒЫНЫ:
Бір жағынан су тартып жатыр. Бір жағынан канализация тартып жатыр.Сол отчистное сооружениядан суды Талды өзеніне ағызайын деп жатыр. Бұл деген дұрыс емес қой. Қарағайлыда жиі ток өшеді.Сол ток ертең мысалы өшіп қалса біз қорғамыз жаңағы судың бәрі сонда кетіп қалады. Жаңағы салғанына қарсы емеспіз. Просто жаңағы ағызған суды басқа жаққа западный жаққа су өзен- көлі жоқ жаққа ағызсын.
МЕЙІРЛАН СӘДУАҚАСОВ, ҚАРАҚАРАЛЫ АУДАНДЫҚ ҚҰРЫЛЫС БӨЛІМІНІҢ ЖЕТЕКШІСІ:
Қаншама қаражат жұмсалып түгел жұмыстар іске асырылды. 90 пайыз жұмыс аяқталды. Жоба аяқталғаннан кейін тиісті тазартылған техникалық судың анализдарын алып суды анализға тапсырамыз. Сол кезде белгілі болатын болады.
Қазір бұл іс Қарағандыдағы әкімшілік сотында қаралып жатыр. Оған құзыретті органдардың өкілдері онлайн қатысуда. Ал тұрғындар қорғаушы жалдаған. «Астана» арнасы Қарқаралы аудандық құрылыс бөлімінің басшысымен телефон арқылы сұқбаттасты. Шенеуніктің айтуынша тазарту қондырғысының жобасы өзгертілмейді. Тек ол іске қосылған соң судың сапасы нашар болса ғана мердігерлерге қатысты қандай бір шара қолданылуы мүмкін.