Атырау қаласының бірнеше бөлігінде, «Квадрат» булану алаңында ауа құрамындағы күкіртсутегінің үлесі нормадағыдан бірнеше есеге асып кеткен
Атырау облыстық экология департаменті баспасөз қызметінің мәліметінше, 18 шілдеге қараған түнгі сағат 00:00-ден таңғы сағат 09:00-ге атмосфералық ауа сапасын бақылайтын бірнеше стансадағы мәліметке мониторинг жүргізілген.
– Мониториг «Қазгидромет» РМК Атырау облыстық филиалының мамандарымен бірге жүргізілді. Мәселен, күкіртсутегінің үлесі №103 «Шағала», №109 «Восток», №110 «Привокзальный», №111 «Жилгородок», №112 «Акимат», №113 «Авангард», №114 «Загородная», «Химпоселок» стансасында рұқсат етілген шекті шоғырланудан 5,2 есеге дейін асқаны тіркелді. Күкіртсутегінің мөдшері 17 шілдеде «Квадрат» су булану алаңында 22 есеге, басты кәріздік сорғы тазарту станциясында 5 есеге асқаны анықталды. Елді-мекендер аумағында атмосфералық ауаның нормадан тыс жоғары деңгейде ластануына жол берген «Атырау облысы Су арнасы» КМК-ға тексеріс жүргізілді, - деп хабарлады департаменттің баспасөз қызметі.
Жинақталған құжаттар Атырау облысының санитариялық-эпидемиологиялық бақылау департаментіне жолданған.