Кофе-аппараттың ішінен тарақан шықты. Сервистік қызмет көрсету мамандары біздің тілшілерге кофе-машиналардың ішін ашып, күтпеген жағдайды көрсетіп жаға ұстатты. Қоғамдық орындарда қаптап тұрған өзіне өзі қызмет көрсететін кофе-аппараттарын кім тексереді? Тілшіміз жауап іздеді.
АЙЖАН ИМАНҒАЛИЕВА, ТІЛШІ:
Американо, капучино, эспрессо, латтэ. Мен әрине латтэні жақсы көремін, сондықтан латтэні таңдаймын. Міне, осылай бір тетікті басу арқылы 30 секундта кофем дайын болды. Бірақ, бұл кофенің ішінде не бар екенін бәріміз де біле бермейміз.
Бұл – әлеуметтік желіде тараған видео. Бірі бұны «фейк» десе, енді бірі мұндай аппарттардың ішінде біз білмейтін сұмдық жасырылғанын жазуда. Өкінішке қарай, бұл сөзді сервистік орталық мамандары да растады.
Иә, жағдай мәз емес. Кофе ұнтақтарының көгергені былай тұрсын, аппараттың ішінен мына тарақанның шыққаны - жағаұстатар жағдай . Әдеттегідей, кәсіп иелері кофе-құрылғыларын сервистік орталыққа мүлдем істен шыққанда бір-ақ алып келеді. Ал кофе-машиналар қуаттылығына сай күнде тазартылып отыруы керек.
АЛЕКСЕЙ НИКУШИН, СЕРВИСТІК ҚЫЗМЕТ КӨРСЕТУ ОРТАЛЫҒЫНЫҢ ЖЕТЕКШІСІ:
Күніне 150 стақан кофе ішілді делік, сәйкесінше сонша қалдық қалады. Олар өздігімен жойылмайды, аппараттың ішінде жинала береді. Уақытылы тазартылмаса көгереді, жағымсыз иіс пайда болады. Кофе ұнтақтарынан бөлек, сүт те бар. Мен өз тәжірибемде уақытылы тазартылмаған құрылғыдан құрт шыққанын көрдім.
Ал, тамақтануды бақылау басқармасы кәсіпкерлік тексерісті себепсіз жүргізе алмайтындарын айтады.
ДАМИРА НҰРАН, ҚР ДЕНСАУЛЫҚ САҚТАУ МИНИСТРЛІГІ БАҚЫЛАУ БАСҚАРМАСЫНЫҢ БАС САРАПШЫСЫ:
Жоқ, біздің ондай құқық жоқ, тек қана кәсіпкерлік шеңберінде ғана жоспардан тыс тексерістер, ол жаңағы шағымдар мен өтініштер түскен кезде сол кезде ғана жүргізіледі + рұқсат беру талаптарына сай тексерістер үш жылда бір рет жүргізіледі.
Алайда, кофе-машиналардың барлығы бірдей лас емес. Оның тазалығы мен санитарлы жағдайы иесіне байланысты.
ДИНАРА ТОЙЧИНА, БАРИСТА:
Оны обязательно дұрыс тазаламаса ұнтақтар қалып қалады ғой, сосын ертең келген кезде осылай айналдырып құр жасай берсе, оның ішінде барлық ұнтақтар жаңағы неге түседі, ол да дәмін бұзып жібереді.
Қазақстанда осындай кофеаппараттары сияқты дайын тағам өнімдерін жасайтын нысандарға жыл басынан бері 19 шағым түскен. Оның 9-ы заң талаптарды бұзғандығы анықталды.
БЛИЦ:
- Ол ыңғайлы, ыңғайлы, бірақ кемшілігі бар+кейбір кезде изжога болады .
- Лучше алма жеген жақсы, кофенің берген энергиясы алмада болады.
- Тәтті ма, слишком сондай, может қантты ұнатпағандықтан солай шығар.
АЙЖАН ИМАНҒАЛИЕВА, ТІЛШІ:
Қалай дегенмен миллиондаған адам әр күнін осы кофемен бастайды. Ал, оның пайдасы мен зиянын әркім өзі шешеді. Ал, мен бүгін бұл кофені ішпейтін болдым.