Ақтауда алғаш рет ПЭТ/КТ орталығы ашылды. Бұл - қатерлі ісікті ерте анықтауға арналған ең заманауи диагностикалық технология. Бұған дейін мұндай зерттеу тек елордалық немесе алматылық клиникаларда ғана қолжетімді болғын. Жаңа орталықтың іске қосылуы өңір тұрғындарына уақытты да, қаржыны да үнемдеп, дертті ерте кезеңде анықтауға мүмкіндік бермек.
Ақтауда алғаш рет Батыс Қазақстан үшін теңдессіз медициналық жоба жүзеге асты. Orhun Medical компаниясы ашқан жаңа ПЭТ/КТ орталығы өңір тұрғындары үшін онкологиялық дертті ерте анықтауға мүмкіндік беретін заманауи технологиялық база. Бұған дейін мұндай диагностикадан өту үшін Маңғыстау мен көршілес облыстардың тұрғындары Астана мен Алматыға баруға мәжбүр болатын.
ГОНЕНЧ ДИРИК, ORHUN MEDICAL КОМПАНИЯСЫНЫҢ БАС ДИРЕКТОРЫ:
Бұл орталық - Батыс өңірінің халқы үшін ерекше маңызды. Енді озық диагностика дәл жанында қолжетімді болады. Біз 4 облыста осындай орталық ашуды жоспарлап отырмыз. Бұл Қазақстандағы медицинаның жаңа деңгейге көтерілуіне үлес қосады.
Жобаға 1 миллиард 300 миллион теңге инвестиция құйылды. Ал мемлекеттік келісім аясындағы жалпы инвестиция көлемі 37 миллиард 900 миллион теңгеден асады. Орталық жылына 3 мыңға дейін зерттеу жүргізуге қауқарлы. Мұнда 25 жаңа жұмыс орны ашылып, алғашқы науқастардың қабылдауы басталып та кетті.
НҰРДӘУЛЕТ ҚИЛЫБАЙ, МАҢҒЫСТАУ ОБЛЫСЫНЫҢ ӘКІМІ:
Бұрын соңды біздің Маңғыстаулықтар осы аппаратқа жату үшін Алматы не Астана қаласына айлар бұрын жазылатын. Ал онкология деген өкінішке орай тез асқынып кететін нәрсе. Енді мына орталық 3 мың адамға есептелген. Әрине, бетін аулық қылсын. 3 мың адам бізде жоқ, бұл жалпы Қазақстанның батыс өңіріндегі ең үлкен алғаш болып ашылған орталық.
Енді маңғыстаулықтар үшін ең басты артықшылық - уақыт пен қаражат үнемі. Емдеуді ерте бастауға мүмкіндік беретін заманауи диагностика қолжетімді бола түсті.