Үкіметтік емес ұйымдардың құқықтық мәртебесін нақтылау қажет. Бұл олардың жұмысын жақсартуға септігін тигізеді. Бүгін Қазақстан азаматтық альясының президенті Қарағандыда өткен кезекті азаматтық форумда осындай ұсыныс жасады. Форумда азаматтық бастамаларды қолдау және дамыту тәсілдері қаралды.
Облыстық ішкі саясат басқармасы мен Қарағанды облысының Азаматтық альянсы ұйымдастырған шарада «Қазақстан халқына» қоғамдық қорының тәжірибесі негізінде қайырымдылықты өңірлерді дамытудың құралы ретінде қарастыру, азаматтық қоғам үшін цифрлық технологиялар мен жасанды интеллект енгізудің тәуекелдері, сондай-ақ «ҚХА-ға 30 жыл – бірлік пен даму жолы» тақырыптары талқыланды. Үкіметтік емес ұйымдардың рөліне ерекше мән берілді. Қазір Қарағанды облысында олардың саны 4 жүзге жуықтайды.
ӘЛІБЕК ӘЛДЕНЕЙ, ОБЛЫС ӘКІМІНІҢ ОРЫНБАСАРЫ:
Елге қолдау көрсетіп қиын сәтте қол ұшын созған жан ашыр адамдар ерекше қадір- қасиетке ие болады. Бүгінгі таңда дәл осындай миссияны үкіметтік емес ұйымдар атқарып отыр. Сіздер халық сеніміне ие болып билік пен қоғам арасындағы ынтымақ арқауына айналдыңыздар.
Қазақстан азаматтық альясының президенті Бану Нұрғазиеваның айтуынша қазіргі таңда талқыланып жатқан үкіметтік емес ұйымдар туралы заңға бірқатар өзгеріс енгізу қажет. Бұл олардың жұмысын қазіргіден де жақсарта түспек.
БАНУ НҰРҒАЗИЕВА, ҚАЗАҚСТАН АЗАМАТТЫҚ АЛЬЯНСЫНЫҢ ПРЕЗИДЕНТІ:
Бізге үкіметтік емес ұйымдардың құқықтық мәртебесін нақытлау қажет. Қазіргі таңда ол басқа қаржылай емес ұйымдармен қатар тұр. Сонымен бірге әрбір әкімдікте тек бізбен ғана өзара әрекет жасайтын кеңес болуы тиіс.Барлық сұрақтар сол жерде талқыланады.
Секциялық отырыстарда ҮЕҰ туралы және мемлекеттік әлеуметтік тапсырыс туралы заң жобалары, адам құқықтары мен этносаралық диалог мәселелері талқыланды. Сондай- ақ Конституция күніне орай «Заманауи Қазақстан» фотокөрмесі мен ерекше балалардың суреттер фестивалі ашылды.