Құтқарушылар жыл басынан бері өрт кезінде 1 459 газ баллонды қауіпсіз жерге шығарды, оның 385-і сыйымдылығы 50 л.
Газ баллондары орналасқан үй-жайлардағы өрттер аса қауіпті жағдайлардың қатарына жатады. Мұндай сәттерде құтқарушылардың әрбір шешімі мен әрекеті адам өмірін құтқарып қалуда шешуші рөл атқарады.
Өз өмірін қатерге тігіп, өрт сөндірушілер тек адамдарды құтқарып қана қоймай, газ баллондарын өрт ошағынан дер кезінде шығарып, жарылыстар мен үлкен қираулардың да алдын алады. Олардың ерлігі мен кәсібилігінің арқасында ондаған отбасы мен тұрғын үйлер аман қалды.
Азаматтық қорғау органдарының өкілдері атап өткендей, газ баллондары бар үй-жайларда өрт қауіпсіздігін сақтау – әр азаматтың жауапкершілігі. Газ құрылғыларын орнату және пайдалану кезінде ережелерді қатаң сақтау жарылыстар мен қайғылы оқиғалардың алдын алады.
ТЖМ газ баллондарын пайдалану ережелерін сақтай отырып, өрт санының өсуін болдырмауға болатынына назар аударады:
- баллондарды тек мамандандырылған пункттерде толтырыңыз. Автожанармай құю станцияларында тұрмыстық газ баллондарын құюға тыйым салынады;
- екі қабаттан асатын тұрғын үйлерде газ баллондарын пайдаланбаңыз;
- баллон корпусын жылытуға жол бермеңіз;
- үй-жайда газдың иісі пайда болған кезде газ беру кранын жауып, үй-жайды желдету үшін терезелер мен есіктерді дереу ашу, ашық отты пайдаланбау, электр қуатын қоспау керек;
- жұмыс істеп тұрған газ құрылғыларын қараусыз қалдырмаңыз;
- балалардың газ құрылғыларын өз бетінше пайдалануына жол бермеңіз;
- газдың ағып кетуін тексеру үшін сабын ерітіндісін қолданыңыз.
Құтқарушылардың күнделікті еңбегі – бұл тек қызмет емес, адам өмірін қорғауға арналған ерлік миссиясы. Олардың жанқиярлығы мен батыл әрекеттерінің арқасында жыл сайын жүздеген төтенше жағдайлардың салдары азайтылады.