Астана қаласының бас мемлекеттік санитариялық дәрігері Айгүл Шағалтаева ЖРВИ мен тұмаудың қарқынды өсуіне байланысты санитариялық-індетке қарсы шараларды күшейту туралы қаулыға қол қойды.
Эпидемиологиялық жағдай ушығып тұр.
45-аптада қалада 23 002 ЖРВИ фактісі тіркелді. Бұл көрсеткіш 44-аптамен (30 қазан – 5 қараша) салыстырғанда 1,5 есе жоғары – ол кезде 14 994 жағдай болған.
14 жасқа дейінгі балалар сырқаттанғандардың 60% құрайды (14 018 жағдай), ал мектеп оқушылары үлесі — 25% немесе 5 752 дерек.
Осыған байланысты бірқатар міндетті шаралар енгізілді:
Үйге шақыртуды қамтамасыз ету үшін жағдай жасау;
Медициналық қызметкерлер мен пациенттерге маска тағуды міндеттеу;
Емханаларда пациенттердің уақытын шектеу, қосымша қабылдау кабинеттерін ашу;
Кіреберістерде сүзгі кабинеттерін ұйымдастыру;
ЖРВИ және тұмау белгілері бар азаматтарды арнайы бөлмеде оқшаулап, амбулаториялық немесе стационарлық емге жолдау;
Медициналық ұйымдардың жұмыс уақытын ұзарту:
• жұмыс күндері – 08:00–20:00,
• демалыс және мереке күндері – 08:00–18:00;
Пациенттерге онлайн консультация ұсыну;
Мектептер мен балабақшалар: қашықтан оқу және таңғы сүзгі
Астана қаласының Білім басқармасы, денсаулық сақтау басқармасымен және МСАК ұйымдарымен бірлесіп, барлық білім беру ұйымдарында мына шараларды қамтамасыз етуі тиіс:
2025 жылғы 20 қарашадан 5 желтоқсанға дейін: бір сыныпта оқушылардың 30% және одан көбі ЖРВИ-мен ауырса, ол сыныпты қашықтан оқыту форматына ауыстыру;
бір инкубациялық кезең ішінде бір сыныптың 20-30%-ында ЖРВИ жағдайы тіркелсе, он күнтізбелік күн бойы кабинет жүйесін тоқтату және сыныпқа жаңа балаларды қабылдамау;
әр ауысым алдында таңғы сүзгі жүргізу – жөтел, қызу, басқа да ЖРВИ белгілері бар балалар мен педагогтарды сабаққа жібермеу;
балалар үйлері, интернаттар, приюттар мен жасөспірімдерге арналған орталықтарда күнделікті сүзгіні (сауалнама, тексеру, қажет болғанда термометрия) ұйымдастыру;
балалардың, жасөспірімдер мен қызметкерлердің күнделікті қатысу мониторингін жүргізу, себептерін анықтау және ауру жағдайлары туралы медицина ұйымдарына хабарлау;
ЖРВИ және тұмау белгілері байқалған балаларды ата-аналары келгенге дейін оқшаулағышта ұстау, қажет болса жылдам түрде ауруханаға жеткізу;
медициналық пункттер мен оқшаулағыштарды термометр, шпатель, бір рет қолданылатын маска, тұмауға қарсы препараттармен жабдықтау;
үй-жайларда +18°С +22°С аралығында температуралық режимді сақтау;
кабинеттерде ылғалды жинау мен желдету режимін күшейту, үзіліс уақытын 10 минуттан 15 минутқа дейін ұзарту;
дәретханаларды сұйық сабын, бір реттік сүлгілермен қамтамасыз ету;
оқушылармен жеке гигиена және ЖРВИ мен тұмаудың алдын алу тақырыбында түсіндіру жұмыстарын, тақырыптық диктанттар өткізуді ұйымдастыру;
бұқаралық мәдени, мерекелік және спорттық іс-шараларды уақытша тоқтату.
Қаулыда эпидемияға қарсы іс-шаралар Астанада ЖРВИ және тұмау бойынша эпидемиологиялық жағдай жақсарғанға дейін жалғасатыны көрсетілген.
Денсаулық сақтау органдары тұрғындарды сақтық шараларын күшейтуге және алғашқы белгілер пайда болғанда дереу дәрігерге жүгінуге шақырды.