Енді медицина қызметкерлеріне күш көрсетіп, қол жұмсағандарға бас бостандығынан айыру жазасы қолданылады. Тиісті заң жобасы Парламент Мәжілісінде бірінші оқылымда қаралып жатыр.
Заңда медицина қызметкерлеріне қатысты зорлық-зомбылыққа байланысты істерді тергеу бойынша ішкі істер органдарының құзыретін анықтауға бағытталған құқықтық нормалар да ұсынылады.
Заң жобасы дәрігерлік көмек көрсету барысында жиі қауіп-қатер мен зорлық-зомбылыққа тап болатын медицина қызметкерлерінің, жедел жәрдем жүргізушілерінің қорғалуын жақсартуға мүмкіндік береді.
“Әріптестер, жалпы, адам баласына күш көрсетіп, қол жұмсауға ешкімнің хақысы жоқ. Қазақстанда әркімнің құқығын қорғау бұл – Президентіміз айтқандай, заң мен тәртіп қағидатының негізгі ұстанымы. «Заң мен тәртіп» қағидаты – шын мәнінде құқықтық, қауіпсіз мемлекеттің негізі. Сондықтан біздің міндетіміз – бұл қағидатты еліміздің құндылықтар жүйесіне барынша енгізу. Әрбір азаматтың өмір салтына, басты ұстанымына айналдыру. Осы ретте, аталған заң жобасының негізгі концепциясының басты ұстанымын қолдауға шақырамын”, – деді Парламент Мәжілісінің депутаты, «AMANAT» партиясы фракциясының жетекшісі Елнұр Бейсенбаев.