Полиция майоры Серғазы Мейерманов үшін донор болу – бір реттік игі іс емес, жүректен шыққан өмірлік таңдау. Көкшетау қаласы полиция басқармасының аға криминалисі қан тапсыруды студенттік жылдарында бастап, содан бері бұл жолдан айныған емес.
25 жыл ішінде ол 40 реттен астам донор болып, шамамен 20 литр қан тапсырды. Мамандардың айтуынша, бұл 80-ге жуық адамның өмірін сақтап қалуға мүмкіндік берген.
Қайырымдылық акцияларына тұрақты қатысып, өзгеге көмектесуді азаматтық парызы санайтын полиция қызметкері белсенді ұстанымы үшін алғыс хатпен марапатталды.
Серғазының өнегелі жолы – нағыз ерлік кейде көзге көрінбей, үнсіз жасалатынын дәлелдейді.