25 мамыр мен 26 маусым аралығында Қазақстан Республикасы аумағында Халықаралық нашақорлыққа және есірткінің заңсыз айналымына қарсы күрес күніне орай есірткіге қарсы айлық өткізілуде. Осыған байланысты Атырау қаласында облыстық полиция департаментінің есірткі қылмысына қарсы іс-қимыл басқармасы "Жастар рухы" жастар қоғамдық бірлестігімен бірлесіп рейдтік іс-шаралар ұйымдастыруда. Іс-шара барысында ғимараттар мен қоршауларға салынған, есірткі құралдарын жарнамалайтын және интернет-ресурстарға бағыттайтын заңсыз граффити жазуларын анықтау және жою жұмыстары жүргізілуде. Рейд нәтижесінде қала аумағында 10-ға жуық заңсыз граффити жазуы боялып, жойылды.
— Жыл басынан бері облыс көлемінде 60-қа жуық заңсыз граффити жазуы жойылды. Сонымен қатар "Киберқадағалау" бағдарламасы арқылы құрамында заңсыз контенті бар, есірткі құралдарын жарнамалайтын 600-ге жуық интернет-ресурс анықталып, оларды бұғаттау үшін Қазақстан Республикасы Ішкі істер министрлігіне жолданды. Айта кету керек, Қазақстан Республикасы Қылмыстық кодексінің 299-1-бабына сәйкес есірткі құралдарын, психотроптық заттарды және олардың аналогтарын насихаттау мен заңсыз жарнамалау үшін қылмыстық жауапкершілік көзделген, — деді есірткі қылмысына қарсы іс-қимыл басқармасының жедел уәкілі Айбол Ідірісов.
Полиция қызметкерлері азаматтарды есірткі заттарын жарнамалайтын граффити жазуларын байқаған жағдайда "102" арнасына немесе есірткі қылмысына қарсы іс-қимыл басқармасының 98-21-55 сенім телефонына хабарласуға шақырады.