Абай облысы Жарма ауданына қарасты Ақжал ауылы қоғамдық тәртіп пен қауіпсіздік мәдениетін нығайту жолында маңызды қадам жасап, ресми түрде "ішімдіксіз ауыл" мәртебесіне ие болды.
72 шаңырақтан тұратын, 157 тұрғыны бар шағын елдімекен үшін бұл бастама әлеуметтік маңызы зор шешім ғана емес, құқықтық тәртіпті күшейтуге және профилактикалық жұмыстың тиімді үлгісін қалыптастыруға бағытталған жүйелі өзгеріс болып отыр. Ауыл тұрғындары алкоголь өнімдерін тұтынуды шектеу арқылы құқық бұзушылықтардың алдын алуды, қоғамдық тыныштықты сақтауды және отбасы құндылықтарын нығайтуды басты мақсат етіп отыр. Бұл бастама тұрғындардың қауіпсіз әрі берекелі орта қалыптастыруға деген ортақ ұмтылысын айқын көрсетеді. Аталған жұмыстың үйлестірушілерінің бірі – учаскелік полиция инспекторы Мади Камзинов. Оның айтуынша, "ішімдіксіз ауыл" жобасы қоғамдық қауіпсіздікті қамтамасыз етудегі ең тиімді профилактикалық тетіктердің бірі саналады.
– Ақжал ауылында тұрғындармен тұрақты түрде түсіндіру жұмыстары жүргізілді. Қоғамдық тәртіпті сақтау, құқық бұзушылықтардың алдын алу және қауіпсіз орта қалыптастыру бағытындағы бірлескен еңбектің нәтижесі бүгінде айқын көрініп отыр. Ең бастысы – тұрғындардың жоғары жауапкершілігі мен полицияға деген сенімі, – дейді учаскелік инспектор.
Бұл бағыттағы жұмыс тек бақылау шараларымен шектелмейді. Құқық қорғау органдары тұрғындармен тығыз байланыс орнатып, түсіндіру, алдын алу және өзара сенімге негізделген әріптестік қағидатын ұстанып келеді. Бастаманың табысты жүзеге асуына ауыл әкімдігі мен құқық қорғау органдарының өзара үйлесімді іс-қимылы да оң ықпал етуде. Ақжал ауылдық округінің әкімі Олжас Бекмолдин бұл мәртебе ауыл тұрғындарының бірлігі мен жауапкершілігінің нәтижесі екенін атап өтті.
– Ақжал ауылының ішімдіксіз мәртебеге ие болуы – тұрғындардың ортақ келісімі мен тәртіпке деген құрметінің көрінісі. Біз үшін ең маңыздысы – ауылдағы тұрақтылық пен қауіпсіз ортаны сақтау. Осы бағыттағы жұмыстар алдағы уақытта да полиция қызметкерлерімен бірлесіп жүйелі түрде жалғасатын болады, – деді ауыл әкімі.
Бүгінде Ақжал ауылы қоғамдық тәртіпті нығайтуға және құқық бұзушылықтардың алдын алуға бағытталған тиімді профилактикалық модельдің жергілікті деңгейдегі жарқын үлгісіне айналып келеді. Мұнда қабылданған шешімдер әлеуметтік бастама ғана емес, қауіпсіздік пен заңдылықты қамтамасыз етуге бағытталған нақты тәжірибе ретінде бағалануда. Ақжал тұрғындарының бұл таңдауы – салауатты өмір салтын ұстануға, қоғамдық келісімді сақтауға және өскелең ұрпаққа үлгі болуға бағытталған маңызды қадам. Бірлік пен жауапкершілікке негізделген мұндай бастамалар қоғамның тұрақты дамуына берік негіз қалайды.