23 жастағы Көкшетау тұрғыны күшті әсер ететін дәрілік препараттармен заңсыз сауда ұйымдастырды. Психобелсенді заттарды сатқаны үшін ол енді 7 жылын бас бостандығынан айыру орындарында өткізуі керек.
Сот анықтағандай, 2024 жылдың күзінен бастап қыз заңсыз айналымы қылмыстық жауапкершілікке әкеп соқтыратын дәрілік заттарды сатумен айналысқан. Ол дәрі-дәрмектерді интернет-ресурстар арқылы үлкен партиялармен сатып алып, таныстарына сатқан. Бұл тәуелділікті тудыратын және адам денсаулығына теріс әсер ететін дәрілер. Оларды тек дәріханаларда және дәрігердің рецепті бойынша ғана сатып алуға болады.
Полицейлер тұрғылықты жерін тінту барысында дәрі-дәрмектерді, сондай-ақ оны заңсыз өткізу мәселелері талқыланған әлеуетті сатып алушылармен хат-хабарларды тауып, тәркіледі. Бұл материалдар қылмыстық іс бойынша дәлелдемелер базасының бөлігі. Сотта куәгерлер күдіктінің заңсыз әрекетінің мән-жайын растады. Анықталғандай, ол бұрын электронды темекі сатумен айналысқан, бірақ кейіннен дәрі-дәрмектерді сатуға көшкен.
Сонымен қатар сот процесінде сотталушының өзі психобелсенді заттарды қолданатыны, психикалық және мінез-құлық бұзылыстары бар екендігі анықталды. Сот әйелді кінәлі деп тауып, орташа қауіпсіздік қылмыстық-атқару жүйесі мекемесінде жазасын өтеп, 7 жылға бас бостандығынан айыруды тағайындады. Сондай-ақ, сот емдеу түрінде медициналық сипаттағы мәжбүрлеу шараларын тағайындады. Полиция ескертеді: емдік дәрі-дәрмектер есірткіге зиянсыз балама емес. Олардың заңсыз сатылымы басқалардың денсаулығын бұзып, сатушыны темір тордың артына апаруы мүмкін. Құқық қорғау органдары азаматтарды күмәнді интернет-ресурстар арқылы дәрілік заттарды сатып алмауға шақырады және күшті дәрілердің заңсыз айналымы қылмыстық жауапкершілікке әкеп соғатынын еске салады.