Жыл соңына дейін 2,3 мың шақырым жол пайдалануға беріледі
Қазақстанда жол инфрақұрылымын дамыту кешенді түрде жүзеге асырылып, республикалық, облыстық және аудандық маңызы бар автомобиль жолдарын қамтиды. Республикалық жол желісінде ірі жобаларды іске асырумен қатар, елді мекендер арасындағы және өңірлер ішіндегі көлік қатынасын қамтамасыз ететін жергілікті жолдардың жай-күйіне де ерекше көңіл бөлінеді, деп хабарлайды Astana TV.
Жергілікті маңызы бар автомобиль жолдарының жалпы ұзындығы шамамен 70 мың шақырымды құрайды. Бүгінде аталған жолдардың 91%-ы нормативтік жағдайда. Жергілікті жолдардың жай-күйін одан әрі жақсарту бойынша жұмыстар олардың техникалық жағдайы мен өңірлердің қажеттіліктерін ескере отырып жалғасады.
2026 жылдың қорытындысы бойынша жергілікті жолдардың нормативтік жағдайдағы үлесін 92%-ға жеткізу жоспарланған. Мәселен, биыл жергілікті маңызы бар 2,4 мың шақырым автомобиль жолында құрылыс, реконструкциялау және жөндеу жұмыстары жүргізілуде. Жыл соңына дейін 2,3 мың шақырым жолдағы жұмыстарды аяқтап, оларды пайдалануға беру жоспарланған.
Биыл аяқтау жоспарланып отырған ірі жобалардың қатарында Семей қаласындағы автокөлік көпірін реконструкциялау, ұзындығы 17 шақырым болатын облыстық маңызы бар «Түркістан – Шәуілдір» автомобиль жолын реконструкциялаудың II кезегі, сондай-ақ ұзындығы 110 шақырымды құрайтын «Лепсі – Ақтоғай» облыстық маңызы бар автомобиль жолын реконструкциялау жобалары бар. Жергілікті жолдардың ең үлкен көлемі Қарағанды облысында – 223 км, Қостанай облысында – 184 км және Солтүстік Қазақстан облысында – 164 км жұмыспен қамтылды. Жұмыстар елдің басқа өңірлерінде де жергілікті жол желісін дамыту басымдықтарына сәйкес жүргізілуде.
Облыстық және аудандық маңызы бар жолдарды дамыту елді мекендердің көлік қатынасын қамтамасыз етуде тікелей маңызға ие. Жергілікті жол желісі елді мекендердің жоғары санаттағы жолдарға шығуын, аудандардың облыс орталықтарымен байланысын, сондай-ақ халықтың әлеуметтік және экономикалық инфрақұрылым нысандарына қолжетімділігін қамтамасыз етеді.
Осылайша, елімізде автомобиль жолдарын дамыту барлық жол желісі бойынша жүргізіледі. Республикалық бағыттарды жаңғыртумен қатар, облыстық және аудандық маңызы бар жолдардың жай-күйін жақсарту бойынша да тиісті шаралар қабылдануда. Бұл бүкіл ел бойынша көлік инфрақұрылымының сапасы мен сенімділігін кезең-кезеңімен арттыруға мүмкіндік береді.