Азамат осы уақытқа дейін КСРО паспортымен жүрген
Шығыс Қазақстан облысының Риддер қаласында 61 жастағы Евгений Федоров алғаш рет Қазақстан Республикасы азаматының жеке куәлігін алды. Бұған дейін ол 1974 жылғы үлгідегі КСРО паспортын пайдаланып келген, - деп хабарлайды Astana TV.
Әртүрлі өмірлік жағдайларға байланысты Евгений Федоров ұзақ уақыт бойы Қазақстан азаматының жеке куәлігін ала алмаған. Бұл мәселені шешу үшін ол Риддер қалалық полиция бөлімінің көші-қон қызметіне жүгінген.
Көші-қон қызметінің мамандары қажетті құжаттарды жинауға көмектесіп, тиісті тексерулер жүргізді және мемлекеттік органдарға сұрау салулар жолдады. Нәтижесінде қажетті мәліметтер анықталып, жеке куәлік алу үшін барлық қажетті жұмыстар аяқталды.
Қазан айының соңында Евгений Федоров Қазақстан Республикасы азаматының жеке куәлігін қолына алды. Енді ол мемлекеттік және әлеуметтік қызметтерді еш кедергісіз пайдаланып, жеке куәлік қажет болатын басқа да мәселелерін шеше алады.
Евгений Федоров көші-қон қызметінің мамандарына көрсеткен көмегі, ықыласты қарым-қатынасы және ұзақ уақыт бойы шешімін таппай келген мәселесін шешуге қолдау көрсеткені үшін алғысын білдірді.