Президент «Халықтық құрылыс» бағдарламасына кедергі келтіруге жол берілмейтінін айтып, мемлекет қаржысының жұмсалуын арнайы комиссия бақылайтынын мәлімдеді
Мемлекет басшысы Қасым-Жомарт Тоқаев сыбайлас жемқорлыққа қарсы күрес күшейтілетінін мәлімдеді. Президент жемқорлыққа батқан адамдардың «Халықтық құрылыс» бағдарламасына зиян келтіруіне жол берілмейтінін ескертті, деп хабарлайды Astana TV.
Президенттің айтуынша, Қазақстан жаңа тарихи кезеңге қадам басты. Енді бұрынғы жетістіктермен шектелмей, Әділетті Қазақстанды құру жолындағы жұмысты жалғастыру қажет.
«Өздеріңізге мәлім, қазір біз жаңа тарихи кезеңге қадам бастық. Енді бір орында тұрып қалуға, бұрынғы жетістіктерді місе тұтып, арқаны кеңге салуға хақымыз жоқ. Әділетті Қазақстанды құру ісінде жалқаулық пен селқостыққа бой алдыруға болмайды», – деді Мемлекет басшысы.
Қасым-Жомарт Тоқаев сыбайлас жемқорлыққа қатысы бар адамдардың мемлекеттік бағдарламаларды жүзеге асыруға кедергі келтіруі мүмкін екенін айтты.
«Ал сыбайлас жемқорлыққа батқан ниеті теріс кісілер – біздің қас жауымыз. Олар қазірдің өзінде «Халықтық құрылыс» бағдарламасын іске асыруға кедергі келтіріп, зиян тигізуді ойлап жүр. Біз бұған, әлбетте, ешқашан жол бермейміз», – деді Президент.
Мемлекеттік құрылыстардың сапасы қатаң бақыланады
Мемлекет басшысы әлеуметтік инфрақұрылым нысандарының сапасына ерекше назар аударды. Оның айтуынша, жолдар, әуежайлар, емханалар, оңалту орталықтары, шығармашылық үйлері, мектептер мен спорт кешендері барлық талапқа сай салынуы тиіс.
«Барлық әлеуметтік инфрақұрылым нысандары, соның ішінде жолдар, әуежайлар, емханалар, оңалту орталықтары, шығармашылық үйлері, мектептер мен спорт кешендері сапалы салынуы керек. Бұл – мүлтіксіз орындалуға тиіс талап», – деді Қасым-Жомарт Тоқаев.
Президент мемлекет қаржысының тиімді жұмсалуын арнайы мемлекеттік комиссия қадағалайтынын хабарлады. Оның құрамы келесі аптаның басында жарияланады.
Мемлекет басшысы аталған шаралардың басты мақсаты халықтың әл-ауқатын арттыру және азаматтардың тұрмыс сапасын жақсарту екенін атап өтті.
«Осы істе Конституциямызда бекітілген Заң, Әділеттілік және Тәртіп қағидаттары айнымас темірқазығымыз болады. Әрине, бұл жол оңай болмайды. Тіпті түрлі қиындықтар да кездесетіні анық. Халқымыз «Жол мұраты – жету» деп бекер айтпаған. Сондықтан табандылық танытып, алға қойған мақсаттарымызға міндетті түрде қол жеткіземіз», – деді Президент.
Осылайша, «Халықтық құрылыс» бағдарламасы аясында мемлекеттік қаражаттың тиімді жұмсалуына және құрылыс сапасына бақылау күшейтілмек. Арнайы комиссияның құрылуы ірі инфрақұрылымдық жобалардың ашық әрі жауапкершілікпен жүзеге асырылуын қамтамасыз етуге бағытталған.