Дрондар дәуірі: Қазақстанда күштік құрылымдар арасында ерекше турнир өтті

MILITARY DRONE CHALLENGE

Еліміздің 15 командасы ұшқышсыз ұшу аппараттарын басқару, әуеден барлау жүргізу және дрондарға қарсы әрекет ету бойынша шеберліктерін сынады

Қазіргі заманда ұшқышсыз ұшу аппараттарының қауіпсіздік пен қорғаныс саласындағы маңызы артып келеді. Дрондар бүгінде тек әуеден бақылау жүргізу үшін ғана емес, барлау жұмыстарында, арнайы операцияларда және маңызды нысандарды қорғауда кеңінен қолданылады. Сонымен қатар оларға қарсы әрекет ету технологияларын меңгеру де өзекті мәселеге айналды, деп хабарлайды Astana TV.

Осы бағыттағы мамандардың кәсіби даярлығын жетілдіру мақсатында Қазақстанда MILITARY DRONE CHALLENGE турнирі ұйымдастырылды.

Жарыс 17 қарашада Қазақстан Республикасы Мемлекеттік күзет қызметінің «Майлан» далалық оқу орталығында өтті. Оған еліміздің күштік құрылымдарының өкілдері қатысып, шынайы жағдайларға барынша жақындатылған арнайы тапсырмаларды орындады.

15 команда, төрт күрделі сынақ

Турнирге әрқайсысы бес адамнан құралған 15 команда қатысты. Олар ұшқышсыз авиациялық жүйелерді басқару, әуеден барлау жүргізу және дрондарға қарсы қорғаныс құралдарын қолдану бойынша өзара сынға түсті.

Жарыс бағдарламасы төрт кезеңнен тұрды.

Алғашқы «Шабуыл» кезеңінде ұшақ үлгісіндегі және мультироторлы дрон операторлары ғимарат пен оның ішіндегі бөлмелерге әуеден барлау жүргізді. Ал шабуылдаушы топ алынған мәліметтерге сүйеніп, ғимараттағы кепілге алынған адамды босату тапсырмасын орындады.

Екінші «Барлау – қону – жүк тастау» кезеңінде қатысушылар әуеден барлау жасап, FPV-дронды қозғалыстағы тіркемеге қондырды. Сондай-ақ белгіленген нысанаға оқу жүгін дәл түсіру шеберліктерін көрсетті.

Үшінші «Ашық аспан» кезеңінде командалар өз ведомстволарының арнайы антидрондық кешендерін пайдаланып, ұшқышсыз аппараттарды анықтау және олардың жұмысын тоқтату бойынша тапсырмалар орындады. Кейін FPV-дронды тегіс ұңғылы қарумен атып түсірді.

Соңғы «Командалық эстафета» кезеңінде жылу камерасымен жабдықталған дрон операторы ғимарат ішіндегі шартты қарсыласты іздеді. Ал FPV-дрон ұшқыштары көру мүмкіндігі шектеулі жағдайда анықталған нысаналарды жою тапсырмасын орындады.

Шабуылдау жаттығулары кезінде қатысушылар страйкбол қаруын қолданды.

Жеңімпаздар анықталды

Төрт кезеңнің қорытындысы бойынша үздік командалар белгілі болды.

Бірінші орынды Қазақстан Республикасы Мемлекеттік күзет қызметінің командасы иеленді.

Екінші орынға ҚР Қорғаныс министрлігі Радиоэлектроника және байланыс әскери-инженерлік институтының командасы тұрақтады.

Үшінші орынды ҚР Ішкі істер министрлігі Ұлттық ұланының командасы жеңіп алды.

Заманауи қауіпсіздікте дрондардың рөлі артып келеді

Турнирді Қазақстан Республикасы Мемлекеттік күзет қызметі «Ashyq Aspan Foundation» қоғамдық қорының техникалық қолдауымен ұйымдастырды.

Сайыстың басты мақсаты – ұшқышсыз авиациялық жүйелерді қолдану және оларға қарсы іс-қимыл тәсілдерін жауынгерлік әрі кәсіби даярлыққа енгізу. Сонымен қатар мемлекеттік органдардың техникалық мүмкіндіктерін арттырып, түрлі ведомство мамандары арасында тәжірибе алмасуға жағдай жасау.

Бүгінде әлемде ұшқышсыз ұшу аппараттарын қолдану аясы кеңейіп келеді. Олар қауіпті аймақтарды бақылауға, қажетті ақпаратты жедел жинауға және адам өміріне қатер төндіретін жағдайларда арнайы тапсырмаларды орындауға мүмкіндік береді.

Алайда дрондардың қолжетімділігі артқан сайын олардан қорғану мәселесі де маңызды бола түсті. Сондықтан қазіргі қауіпсіздік жүйесінде ұшқышсыз аппараттарды тиімді басқара алатын ғана емес, оларды дер кезінде анықтап, қауіптің алдын алатын мамандарды даярлау қажет.

MILITARY DRONE CHALLENGE турнирі осы бағыттағы практикалық дайындықты жетілдіруге және күштік құрылымдардың заманауи технологияларды меңгеруіне мүмкіндік берді.