Ал Керекулік қауым айттау дәстүрін жаңғыртуда. Павлодар облысы Заря ауылының
тұрғыны Жақсылық ақсақалдың әулеті Құрбан айтта міндетті түрде айт дастарханын
жайып, туған-туыс, көрші-қолаңды күтеді. Бүгін де қарияның қара шаңырағында
көпшілік бас қосты.
Тоқсанға келген Жақсылық ақсақал өзін құттықтай келген әрбір адамды осылай үй
ауласында қарсы алады. Айтуынша, Құрбан
айт - сәлемдесуден басталатын әдемі мереке. «Қол алысып, амандық сұрасу арқылы
біз шынайы ниетпен келген қауымға ықыласымызды
білдіреміз», - дейді қария. Әр шаңыраққа айттап барудың да өзіндік сыры
бар.
Жақсылық
Әлжебайұлы:
Қырық
үйге кірсе жақсы дейді. Оған жұмақтың есігі ашылады дейді. Жоқ, 40 үй емес, 7
үйден қалмау керек дейді. Жоқ 3 үйге кіру керек дейтіндер бар. Дәл ондай
кесіліп қойған заң-ереже емес. Діни мереке болса да, көп жағдайда тәлім
тәрбиелік маңызы зор. Бүкіл адамды ынтымыққа тартатұғын, бүкіл адамды болашаққа
сендіретұғын мерекенің ішіндегі осындай мереке.
Жақсылық
атаның әулеті үбірлі-шүбірлі. Қарияның өзі 14 баласынан жүзден аса
немере-шөбере сүйіп отырған бақытты жан. Құрбан айт мерекесінде барлық перзенттері мен олардан өрбіген ұрпақтарды
қара шаңыраққа жинау - бұл үйдің дәстүріне айналған. Ұлық мерекенің дастарханы да
ерекше. Мерекелік мәзірге кіретін тәтті-дәмділер міндетті түрде үй жағдайында арнайы дайындалады екен.
Назерке
Мұхтарқызы:
Қүрбан
айт әрқашан отбасылық мереке іспеттес. Сондай бір сезім әкеледі. Отбасылық,
көңілді. Әрқайсымыз бір-бірімізді құттықтап, арқа-жарқа болып жиналудың өзі - үлкен той-думан.