Бүгін Қазақстан Президенті де жарыссөз алып, тың ұсыныстар жасады. Нұрсұлтан Назарбаев БҰҰ штаб пәтерін батыстан Азия құрлығына көшіруді ұсынды. Ұйымның Нью-Йоркте өтіп жатқан бас ассамблеясында Қазақстан басшысы батыстың әлемдік қарым-қатынастардағы рөлі 70 жыл ішінде бәсеңдеп, басымдық шығыс елдеріне көшкендігін алға тартады. Нұрсұлтан Назарбаев ұйымның әлемдік процесстердегі рөлін ерекше атап, оның 100 жылдық датасы, 2045-ші жылға дейін «жаһандық даму стратегиясы» құжатын әзірлеуді ұсынады. Құжаттың маңызды тұстарының бірі - ядролық қарусыз қоғам орнату. Сондай-ақ, Президент резервтік валюта енгізу туралы бастама көтерді.
Нұрсұлтан Назарбаев, Қазақстан Республикасының Президенті:
ХХI ғасырда әлемге сапалық тұрғыдан жаңа қаржы құралдары керек. Жаһандық орнықты даму мен өсіп-өркендеудің мақсаттары мен міндеттеріне сай келетін ұлт үстілік әлемдік валюта әзірлеу бағытындағы Біріккен Ұлттар Ұйымына мүше елдердің күш-жігерін біріктіру қажет.
Сайын Бөрбасовтың сөзінше, Нұрсұлтан Назарбаевтың бастамасы қолдау тауып, жаңа валюта айналымға шыққан күнде долларға басыбайлы байланған әлемдік қаржылық құрылым өзгермек. Осылайша, дамушы мемлекеттер экономикасы АҚШ-қа тәуелділіктен арылады деген ойда. Ал бұл әлемдік экономика проблемаларын шешуі мүмкін.
Сайын Бөрібасов, саясаттанушы:
Әлемдік қаржылық тәртіптер бүкіләлемдік қаржы орталықтарының диктатына негізделген. Дүниежүзіндегі кез-келген елдің экономикасының долларға тәуелділігі АҚШ-тың қаржылық орталықтарының бағыныштылығына әкеледі. Сондықтан әр мемлекет бірінші кезекте өз ұлттық экономикасын тығырықтан шығаруды ойлауы керек.
Азамат АЛДОҢҒАРОВ