Қытайлық бірнеше трансұлттық компания Қазақстанның ауыл шаруашылығы саласына 1 миллиард АҚШ валютасынан артық инвестиция құяды. Тиісті келісімдерге бүгін Астанада қол қойылды.
Қазақстан мен Аспан асты елі арасында ауыл шаруашылығы саласында бірлескен 19 жоба іске асырылмақ. Олардың арасында алпауыт компаниялар бар. Шығыс Қазақстан облысында жылына 17 мың тонна сиыр және қой етін өндіретін ет комбинаты мен 50 мың бас қой, бір мың бас ірі қара бордақылайтын алаң салынбақ. Өнімнің 80 пайызы Қытайға тікелей саудаланады. Жобаның құны 7 миллиард 900 миллион теңгеге бағаланады. Оның тең жартысы - қытайлық компаниялардың ақшасы.
Гүлмира Исаева, ҚР Ауыл шаруашылығы вице-министрі:
19 жобадағы шетелдік инвестициялар көлемі 1 миллиард 735 миллион долларды құрайды. Өнім тасымалын жеңілдету үшін, олардың он екісін Қытай шекарасына жақын Шығыс Қазақстан мен Алматы облыстарында салдық. Жобалар ет, өсімдік өнімдерін қамтиды. Негізгі экспорттық тауарлар - сиыр, қой еттері және бал. Бұл позициялар бойынша нақты шешім бар. Жақын арада қытайлық мамандар келіп, біздің өнімнің санитарлық талаптарын тексереді.
Азамат АЛДОҢҒАРОВ