Елорда әуежайындағы жағдайға қатысты арнайы комиссия құрылды. Комиссия жұмысының барысын министр Қайырбек Өскенбаев тікелей өзі бақылайтын болады. Кешегі жаңалықтарымызда Нұрсұлтан Назарбаев халықаралық әуежайының жұмыскерлерінің шағымын көрсеткен едік. Бас қаладағы стратегиялық нысанда адам да, жұмыс техникасы да жетіспейтінін айтты. Оның үстіне берілетін арнайы жұмыс киімнің сапасы сын көтермейді деген болатын. Жүк тасушылар денсаулыққа зиян келгені үшін де төленетін өтемақы мардымсыз деген еді. Осыған орай Индустрия және инфрақұрылымдық даму министрлігі жедел шаралар қабылданғанын хабарлады. Сондай-ақ жазбада, арнайы құрылған комиссия мәселелерді жіті тексеретінін, тексеріс қорытындысы бойынша шаралар мен тиісті шешімдер қабылданатынын айтты.
ҚР ИИДМ БАСПАСӨЗ ХАТШЫСЫ:
Әуежай қызметкерлерінің шағымын жан-жақты, толық әрі объективті тексеру мақсатында Индустрия және инфрақұрылымдық даму министрінің 2022 жылғы 10 маусымдағы №332 Бұйрығымен арнайы комиссия құрылды.
Ә. Дүкембаева