Жамбыл облысында есірткі дайындап, өзге өңірлерге өткізіп келген топ анықталды. 39 және 51 жас аралығындағы 5 азаматтың қолына кісен салынды. Бұл туралы полиция мамандары хабарлады. Ұсталған ер адамдардың төртеуі – Байзақ ауданының тұрғындары, біреуі Тараз қаласынан. Күдіктілердің бірінің өндірістік базасында, каннабис өсімдігін өсіріп келгендігі анықталды. Жүргізілген тінту кезінде тіркелмеген 2 тегіс ұңғылы мылтық, 25 аңшылық және 16 травматикалық патрондарды заңсыз сақтағандары белгілі болды. Сондай-ақ жалпы салмағы 1 келіден астам гашиш, 30 келіден асатын «марихуана» тәркіленді. Одан бөлек есірткі дайындауға арналған құралдар табылды.
Асқар ЖҰМАБЕКОВ, ЖАМБЫЛ ОБЛЫСЫ ПД БАСҚАРМА БАСТЫҒЫ:
Қазіргі уақытта ұсталғандардың барлығы өз кінәларын мойындап, Тараз қаласы Полиция басқармасының уақытша ұстау изоляторына қамаққа алынды. Аталған қылмыстық іс бойынша Жамбыл облысы Полиция департаментінің тәжірибелі қызметкерлерінен тергеу-жедел тобы құрылды, сотқа дейінгі тергеу амалдары жүргізілуде.
Б. Жұмабай
