Басшылық
Асқар Лаула Оразақынқызы

Асқар Лаула Оразақынқызы

Асқар Лаула Оразақынқызы 1974 жылдың 26 ақпанында Алматы қаласында туылды. Әл-Фараби атындағы Қазақ Ұлттық Мемлекеттік Университетінің журналистика факультеті магистратурасын бітірді. Қазақстан Журналистер Одағының және Авторлар Қоғамының мүшесі.

Қызметтік жолын 1992 жылы Халықаралық «Азия дауысы» фестивалінің баспасөз қызметінен және ұйымдастыру комитетінен бастады. 2000 жылы «Хабар» Агенттігіне ауысып, жаңалықтар қызметінде тілші, «XXI ғасыр көшбасшысы» бағдарламасында жүргізуші, CaspioNet арнасында редактор болды. 2006 жылы ҚР Қаржы Министрлігіне қарасты «Қазақстан Ипотекалық Компаниясының» баспасөз қызметін басқарды. 2008 жылы Астана қаласы Мәдениет басқармасының бөлім бастығы болып тағайындалды. 2009-2013 жылдар аралығында «Бейбітшілік және келісім сарайы», «М. Өтемісұлы атындағы Оқушылар сарайы» МКҚК директор орынбасары қызметін атқарды. 2014 жылы «Астана Конвеншн Бюросында» Astana Official Guide журналының бас редакторы болды. 2013-2014 жылдары ҚР Мәдениет және спорт министрлігінде Кинематография және театр өнері басқармасының басшысы қызметін атқарды. 2018 жылдың наурызынан бастап «Орда ФМ» радиосының директоры.

 Лаула Асқар көптеген танымал әндердің авторы, олардың ішінде «Орда» тобының «Кеш мені», «Қағаз кеме», «Ринго» тобының «Ғашықпын», Семей қаласының әнұранына айналған «Туған қалам Семейім» әні, Астана экономикалық форумы, «Қазмедиаорталығы» және «Аялаған Астана» балалар байқауының әнұрандары бар. Оған қоса «Арнау» тобының орындауындағы «Астана – менің махаббатым» қазақ-түрік сериалының саундтрегінің авторы.

«Астанаға 10 жыл» меділімен, ЕҚЫҰ ұйымдастырудағы белсенділігі үшін Қазақстан Президенті Н. Назарбаевтың Алғыс хатымен, Астана Күнін, ҚР Тәуелсіздігінің 20-жылдығын, Қысқы Азия Ойындарын ұйымдастырудағы белсенділігі үшін Астана қаласы әкімінің грамоталарымен марапатталған.

Астана қаласы жайлы YouTube арнасында қазақ, орыс және ағылшын тілдерінде авторлық блог жүргізіп, Қазақстанда туризмнің дамуына өз үлесін қосуда.