Түркістан облысында қайтарылған жердің үлесі 1 млн 300 гектарға жетті. Былтыр 335 мың гектар жайылымдық жер мемлекет меншігіне алынды. Өңірде ауыл шаруашылығы мақсатындағы телімдерге қатысты әлі де мәселе бар.
Өңірде жер мәселесі өте өзекті. Төлеби ауданының тұрғындары Қаратөбе ауылдық округінде пайдаланылмай жатқан жекеменшік жерді ортақ игілікке қайтарудың тиімді құқықтық жолдарын қарастыруды сұрайды. Ал Жетісайлық қария талай жылдан бері тартысқа түсіп келе жатқан 1 мыңнан астам гектар жердің жайын қозғады.
Дүйсен ТОРЫБАЕВ, ЖЕТІСАЙ АУДАНЫНЫҢ ТҰРҒЫНЫ:
Соны біздің халықтың игілігіне, өкіметке өтіп, халықтың игілігіне берсе, мұқтаж жандарымыз 1 гектардан тиген жағдайда мысалы сол мың гектарыңыз мың адамға тиеді екен. Мың адамыңыз бес жанұя болғанда 5 мың адам жұмыспен қамтылды деген нәрсе.
Түркістан облысында бүгінге дейін 1,3 млн. гектар жер қайтарылған. «Жер аманаты» комиссиясы бұл тұрғыдағы жұмыстарды әлі де жалғастырады.
Әділбек ОРАЗОВ, ТӨЛЕБИ АУДАНЫНЫҢ ТҰРҒЫНЫ:
Аудан көлемінде 26 200 гектар осы 2021-2023- тің ішінде мемлекетке қайтып қайтарылды. Бұл – сол жердегі тұрғындардың ауыл төңірегіндегі жайылымдардың игілігін пайдалану үшін бірнеше дау-дамай мәселелер болған еді, солар шешілді деп айтуға болады.
Мақсатты пайдаланылмай жатқан аумақтарды ортақ қорға қайтаруда мемлекеттік органдардың қызметі қайта қарастырылып, құзыреті күшейтілмек.
Бақытжан БАЗАРБЕК, ҚР ПАРЛАМЕНТІ МӘЖІЛІСІНІҢ ДЕПУТАТЫ, «ЖЕР АМАНАТЫ» КОМИССИЯСЫ ТӨРАҒАСЫНЫҢ ОРЫНБАСАРЫ:
Халықтың мал жаятын жерлерін қайтарсақ, бұл азық-түлік қауіпсіздігін қамтамасыз етеміз. Бұл- халықтың әл-ауқатын көтереміз. Бұл- ауылдың деңгейін көтеріп, халықты қаладан ауылға қайттан қайтарамыз.Бірнеше мақсатты көздейтін дүние.
Комиссия мүшелері Қазығұрт ауылында да қоғамдық қабылдау өткізді. Мұнда да келушілердің негізгі сауалы жерге қатысты болды. Себебі, сегіз жүзден астам елдімекені бар Түркістан өңірі халқының сексен пайызға жуығы ауылда тұрады. Ондағы ағайынның негізгі кәсібі жермен тікелей байланысты.
