Мойынқұм аудандық сотында зейнеткер әкесін ұрған ер адамға қатысты әкімшілік іс қаралды, деп хабарлайды Azattyq Rýhy.
Оқиға 2024 жылдың наурыз айында болған.
«Құқық бұзушы 86 жастағы қарт әкесіне дөрекі сөздер айтып, оны ұрып-соғып, денсаулығына қасақана аз зиян келтірді, осылайша отбасылық-тұрмыстық қатынастар саласында заңсыз әрекеттер жасады», – делінген хабарламада.
Зейнеткер бұл фактілерді растады және соттан істі тоқтатуды сұрады, өйткені олар татуласты (медиация жасалды).
Өз кезегінде сотталушы өз кінәсін толық мойындады. Оның айтуынша, жанжал кезінде ашуланып, әкесіне қол көтерген. Ер адам жасаған ісіне өкініп, әкесімен татуласуына байланысты істі тоқтатуды сұрады.
ӘҚБтК-нің 64-бабына сәйкес Кодекстің 73-1-бабының 1-бөлігінде көзделген әкімшілік құқық бұзушылық туралы істер жәбірленушінің өтініші бойынша ғана қозғалады және оны әкімшілік құқық бұзушылық жасаған адаммен татуластырғаны үшін тоқтатылады.
Татуласу жәбірленуші мен әкімшілік құқық бұзушылық жасаған адам қол қойған жазбаша келісім негізінде жүзеге асырылды.
Сот қаулысымен іс тоқтатылды.
