Астанадағы Тәуелсіздік сарайында Шанхай ынтымақтастық ұйымының саммитіне қатысушыларды қарсы алу рәсімі аяқталды.
Ең алдымен, Мемлекет басшысы Қасым-Жомарт Тоқаев Үндістан Республикасының Сыртқы істер министрі Субраманьям Джайшанкарды қарсы алды және қол алысып, суретке түсті. Осыдан кейін Президент мәртебелі мейманды конференция залына шығарып салды.
Одан кейін Тәуелсіздік сарайына Қырғыз Республикасының президенті Садыр Жапаров келді. Бауырлас елдердің басшылары рәсім кезінде аз-кем тілдесіп үлгерді.
Сонымен бірге, ШЫҰ саммитіне Пәкістан Ислам Республикасының Премьер-Министрі Шахбаз Шариф келді. Қазақстан мен Пәкістан ұйымдар арасындағы өзара іс-қимылын, сондай-ақ екіжақты сауда-экономикалық, көлік-логистикалық және гуманитарлық ынтымақтастығын дамытып келеді. IT индустрия және қаржы саласы да перспективалы бағыттар болып саналады.
Саммит қонақтары арасында Иран Президентінің міндетін атқарушы Мохаммад Мохбара бар. Мамыр айында Иран Президенті Ибрагим Раисидің мезгілсіз қаза табуына байланысты, елде сайлау жүріп жатыр. Өткен жылы Иран ШЫҰ-дағы байқаушы-мемлекет мәртебесінен толыққанды мүшелікке ауысқан еді.
Одан кейін Тәуелсіздік сарайына Өзбекстан Республикасының Президенті Шавкат Мирзиёев келді.
Сондай-ақ ҚР Президенті Тәжікстан Республикасының Президенті Эмомали Рахмонмен қол алысты.
Шара қонақтарының бірі – Беларусь Республикасының Президенті Александр Лукашенко. Биылғы саммитте Беларусь ШЫҰ толыққанды мүшесі болады.
Қазақстанның тату көршісі – Ресей Федерациясының Президенті Владимир Путин Тәуелсіздік сарайына өз көлігімен келді. Президент Қасым-Жомарт Тоқаев суретке түсу рәсімінен кейін мейманды конференция залына шығарып салды.
Тағы бір маңызды қонақтардың бірі – Қазақстанға 2 шілде күні мемлекеттік сапармен келген ҚХР Төрағасы Си Цзиньпин. Президент Қасым-Жомарт Тоқаев мейманмен қол алысу рәсімінен кейін біраз қытай тілінде әңгімелесті.
Қарсы алу рәсімінен соң ұйымға мүше мемлекеттерден келген делегациялардың басшылары бірлесіп суретке түсті.
