Трассадағы 22 млн теңгенің VIP дәретханасы әлі жарамсыз. SMARTNEWS.KZ басылымының хабарлауынша, Абай облысындағы тас жол бойына дәретхана салынды. Алайда әлі іске қосылмаған нысан қазірдің өзінде қирап тұр. Бұл туралы KTK телеарнасы мәлімдеді. Телеарна хабарлауынша, Семей маңында құны пәтер бағасымен бірдей бос тұрған әжетхана бар. Ол былтыр тас жолға орнатылды, бірақ нысан әлі жұмыс істемей, құлай бастаған. Телеарна дәретханаға келушілердің бірінің видеосын бөлісіп, оның әлі жұмыс істемейтінін көрсетті.
"Абай облысында 22 миллионға қоғамдық дәретхана салынды, жұмысшылар бар, бірақ дәретхананың өзі жұмыс істемейді", - дейді видео авторы.
Тұрғындар мен қоғам белсенділері жол бойындағы дәретхананың бағасын қаладағы жайлы пәтермен салыстыруға болады деген ойда. Шенеуніктер болса туристер мен тасымалдаушыларға ыңғайлы болу үшін тырысқанын айтады. Олар бірден екі модульдік нысан орнатып мүмкіндігі шектеулі жандарға жағдай жасаған. Вандализмге қарсы дәретханалар мен раковиналар, бейнебақылау камералары, жылыту, кондиционер және сумен қамтамасыз етілді. Алайда мұның бәрі әлі іске қосылған жоқ. Бұл жағдайға Абай облыстық жолаушылар көлігі және автомобиль жолдары басқармасының баспасөз хатшысы Әсем Нұрланқызы түсініктеме берді.
"Бүгінгі күні модульдік нысан қосымша дайындық жұмыстарына байланысты уақытша жұмыс істемей тұр, нысан пайдалануға берілгенге дейін мердігердің бақылауында", - деді Нұрланқызы.
