Қазақстанда жоғары балл алса да грантқа түсе алмай қалған талапкерлер үшін 10 мың грант бөлінді деген ақпарат шындыққа жанаспайды. Бұл туралы Azattyq Rýhy редакциясының сауалына жауап берген ғылым және жоғары білім министрлігінің баспасөз қызметі хабарлады.
«Ақпарат агенттіктері мен әлеуметтік желілерде биылғы түлектерге 10 мың қосымша грант бөлінді деген ақпарат таралып жатыр. Бұл ақпарат бүгінгі күні өзекті емес екенін ресми түрде мәлімдейміз. Бұл жаңалық министрдің 6 тамызда айтқан сөздеріне негізделген. Яғни, сол кезде министрліктен әкімдердің, университеттердің, сондай-ақ жеке қорлардың гранттары есебінен грант иегерлерінің тізіміне кірмеген талапкерлер үшін қосымша тегін оқу мүмкіндіктерін ұсыну туралы ақпарат өзекті болды», - деп түсіндірді министрлік.
Дереккөзге сүйенсек, қазір осы 10 мың гранттың ішінен 2,5 мыңнан астам әкім гранты, мыңнан астам университет гранты иегерлері белгілі болды, «Қазақстан халқына» Қорынан, сондай-ақ жеке компаниялар тарапынан грант бөлу мәселесі қаралып жатыр.
«25 тамыздан кейін бас тартылған гранттардың саны белгілі болады. Бұл гранттар бөлінеді», - деп хабарлады министрлік.
