Петропавлда полицейлер зейнеткерді 3 миллион теңге шығыннан құтқарды, - деп хабарлайды Massaget.kz тілшісі Polisia.kz-ке сілтеме жасап.
Петропавлдық 63 жастағы зейнеткер интернет-алаяқтардың құрбаны бола жаздады. Оған белгісіз адамдар қоңырау шалып, өздерін күш құрылымдарының бірінің қызметкерлері ретінде таныстырған. Олар қала тұрғынына оның банктік шотына алаяқтар күмәнді операция жүргізіп жатқанын және сол істі тергеп жатқанын айтып сендірген. Тұтқаның арғы жағындағылардың айтуынша, бұл қолсұғушылықты тоқтату үшін әйел барлық жиған-тергенін басқа банктегі "қауіпсіз шотқа" аударуы тиіс болған. Бұны естіген қала тұрғыны қылмыскерлердің нұсқауларын орындау үшін көрсетілген банкке 3 миллион теңге сомасында қолма-қол ақша алып бара жатқан. Бірақ бұл ақшаны банкомат арқылы қалай аудару керек екенін білмеген. Банкоматқа бара жатып, полиция бекетін көрген. Асыққан әйел бекеттің ішінде отырған полиция қызметкерінен көмек сұрауды жөн көрген.
Модульде кезекшілікте отырған патрульдік полиция батальонының инспекторы Алмат Мұхаметқалиев зейнеткерді тыңдап, хабарласқан әлдебіреулер алаяқтар екенін айтқан. Бірден жедел тергеу тобын шақырды. Бұл факті ақпаратты есепке алу кітабында тіркелді. Осылайша, тәртіп сақшысы қылмыстың алдын алды. Полицейлер бөгде адамдардың нұсқауы бойынша қаржылық операцияларды орындауға болмайтынын еске салады және адамдардан қарт туыстарына алаяқтықтың қаупі туралы ескертуді сұрайды.
