Өзбекстанда 2028 жылдан бастап кезең-кезеңімен Аи-80 маркалы бензинді пайдалануға тыйым салынады деп жоспарланып отыр. Бұған дейін елдің 2025 жылдан бастап жанармайдың бұл маркасынан бас тартатыны хабарланған болатын, - деп жазды KAZINFORM.
Өзбекстанда Аи-80 бензинін пайдалануға тыйым салу мерзімі кейінге шегерілді. Бұл Шавкат Мирзиеевтің 24 қыркүйектегі шаңды дауылмен күресу және ауаның сапасын жақсарту бойынша бірінші кезектегі шаралар туралы шешімінде нақтыланды.
— Қаулыда бекітілгендей, Ташкент қаласының атмосфералық ауасының сапасын жақсартуға бағытталған шұғыл шаралар бағдарламасына сәйкес, 2028 жылдан бастап экологиялық категориясы «Еуро-4» стандартынан төмен автокөлік жанармайын пайдалану және сату кезең-кезеңімен шектеледі, — делінген хабарда.
Айта кетейік, еліміздің оңтүстік өңірлерінде АИ-92, АИ-95 бензинін және дизель отынын тұтыну айтарлықтай өскені байқалған.
Осыған орай 10 қаңтар күні ҚР Премьер-Министрінің бірінші орынбасары Роман Склярдың төрағалығымен ішкі нарықты мұнай өнімдерімен қамтамасыз ету мәселесі бойынша кеңес өткен болатын.
Бұған негізгі себеп болып отырған жағдайлар — көрші елдермен салыстырғанда, Қазақстандағы баға айырмашылығына байланысты мұнай өнімдерінің сыртқа кетуі және «сұр экспорт».
