Оқу-ағарту министрлігі білім ұйымдарында ақша жинаудың заңсыздығы туралы тағы да ескерту жасады, деп хабарлайды inbusiness.kz сайтының тілшісі.
Министрліктің дерегінше, жуырда 2 мыңнан астам білім ұйымдарының басшылары мен аумақтық департаменттердің өкілдерінің қатысуымен коррупциялық тәуекелдерді алдын алу және ескерту мақсатында жиналыс өтті.
"Қатысушыларға коррупциямен күрес, бақылау шараларын ұйымдастыру, қызметтің өзін өзі бағалауы туралы жан-жақты түсініктемелер берілді. Білім ұйымдарында әртүрлі сылтаулармен заңсыз ақша жинаудың алдын алу мәселелеріне, сондай-ақ, педагогтардың кәсіби қызметіне қатысты заң талаптарының бұзылуына ерекше назар аударылды", – деп хабарлады министрлік.
Қазақстанда педагогтарды кәсіби қызметімен байланысты емес жұмыстарға тарту, тауарлар мен қызметтерді сатып алу міндетін жүктеу заңмен тыйым салынған. Бұл нормалардың бұзылуы заңнама шеңберінде жауапкершілікті қарастырады.
"Білім беру процесінің әрбір қатысушысы адалдық пен әділеттіліктің үлгісін көрсетуге тиіс. Коррупцияның алдын алуға көмектесуі қажет. Біз осы принциптердің қатаң сақталуының маңыздылығына назар аударамыз және педагогтар мен білім ұйымдарының басшыларын коррупциялық құқық бұзушылықтар туралы хабарлауға шақырамыз", – деді білім саласындағы сапаны қамтамасыз ету комитетінің төрағасы Ернұр Дәуенов.
Заңсыз ақша жинау фактілері немесе басқа коррупциялық көріністер анықталған жағдайда, дереу аумақтық департаменттерге немесе білім министрлігінің сапаны қамтамасыз ету комитетіне +7 (7172) 74-23-92 нөмері бойынша хабарласу ұсынылады.
