Орал қаласында қос қабатты ғимаратта орналасқан дәмхана өртенді.
БҚО ТЖ департаментінің баспасөз қызметінен мәлім еткеніндей, оқиға 30 қазан күні сағат 09.45-те М.Шолохов көшесі бойындағы 5Б-мекенжайында болды.
Өрт сөндірушілер (үш бөлімше) келіп жеткенде, ғимаратты қатты түтін алып кеткен. Сол себепті өрт екінші рангі бойынша жүргізіліп, облыстық штаб ұйымдастырылды.
«Өрт кафенің жертөлесінен шыққан. 2022 жылы салынған ғимараттың жалпы аумағы – 826 шаршы метр. «Тілсіз жауды» ауыздықтауға 47 адам, 12 техника жұмылдырылды. Өрт сағат 10.29-да оқшауланып, 11.22-де сөндірілді. Зардап шеккендер жоқ. Қазіргі кезде өрттің шығу себебі, келтірілген шығын анықталып жатыр», деп хабарлады ведомстводан.
