Жұмысы мардымсыз. Үкімет басшысы өзіне ұнамай жүрген әкімдердің кім екенін айтты. Олжас Бектенов жылу беру кезеңі енді басталса да, екі күннің бірінде апат болады дейді. Небәрі бір айда 130-дан аса өрт тіркелген. Уланып, қайтыс болғандар да бар. Бұған- басшылардың қарапайым ережені сақтай алмауы себеп. Әсіресе Жетісу, Ақмола, Ақтөбе облысы мен Алматы қаласының әкімдері тиісті міндетті атқара алмай отыр.
ОЛЖАС БЕКТЕНОВ, ҚР ПРЕМЬЕР-МИНИСТРІ:
Осындай үйлердің барлығына улы газ датчиктерін тегін орнату қажет. Алайда Жетісу, Ақмола, Ақтөбе облыстарының және Алматы қаласы әкімдіктерінің бұл бағыттағы жұмыстары мардымсыз екенін атап өткім келеді. 2%-дан 14%-ға дейін ғана қамтылған. Аталған әкімдіктер жұмысты күшейтіңіздер.
Ал, төтенше жағдай министрі өртке қарсы барлық шара қабылданып жатқанын айтты. Биыл бюджеттен 728 арнайы техника, 18 мыңнан астам құрал-жабдық сатып алмақ. Құны 120 млн теңге болатын 2 дрон алу да жоспарда бар. Ол 150 метрге дейін көтеріліп жалынды сөндіре алады.
ШЫҢҒЫС ӘРІНОВ, ҚР ТӨТЕНШЕ ЖАҒДАЙЛАР МИНИСТРІ:
Жүргізіліп жатқан жұмыс азаматтарды өрт кезінде өзін-өзі құтқару дағдыларына кезең-кезеңімен үйретеді, осылайша қауіпсіздік мәдениетінің деңгейін арттырады.
