Желіде Ақтөбе облысы Қандыағаш қаласында бұрынғы имам, теолог төрт баласының анасына зорлық-зомбылық көрсеткені туралы ақпарат тарады. Бұл туралы Stan.kz ақпарат агенттігі хабарлайды.
Жәбірленушінің сіңлісінің айтуынша, теолог жездесі әпкесіне дінмен манипуляция жасап, туыстарымен араластырмай, үйінде қамап ұстаған.
"Күйеуі мектеп кезіндегі достарымен сөйлесуге де тыйым салды. Сүйікті ісімен айналыстырмады. Әйелдердің бәрі харам деп, олармен де араластырмады. Сондай-ақ бірыңғай жын мен тозақ туралы уағыз айтып, айтқанымды орындамасаң, разылығымды алмайсың деп ұрып-соққан. Әпкемнің түк жазығы жоқ. Өте жуас болды. Дінді жақсы ұстанып, күйеуінің разылығын аламын деп, айтқанын екі етпеді. Соңында бағынышты болып, өзі ауру болып қалды. Ауруға шалдыққанын білсе де, күйеуі медицина қызметіне жүгінбей, дін қызметкерлерін шақырып өз беттерінше емдемек болған. Осылайша әпкемнің ауруы асқынып кеткен", – дейді сіңлісі.
Сондай-ақ ол қазір әпкесінің өзімен бірге тұрып жатқанын айтты.
"Қазір әпкем төрт баласымен жанымда. Ал теолог күйеуі өз жұмысын жалғастырып жатыр. Әпкем ауруға шалдыққан соң күйеуі тастап кетті", – дейді ол.
Аталған жағдайға қатысты Ақтөбе облысы полиция департаменті жауап берді.
"Полиция аталған факті бойынша тексеру жүргізіп жатыр. Қазір ерлі-зайыпты арасында ажырасу процесі жүріп жатқанын қосымша хабарлаймыз. Кейінгі екі жылда зайыбынан күйеуінің тарапынан зорлық-зомбылық туралы арыз түскен жоқ", – делінген хабарламада.
