"Болашақ" бағдарламасы арқылы енді мектеп оқушылары да шетелде жоғары білім ала алады. Өзге елде бакалавриат оқу мүмкіндігі халықаралық олимпиадалар мен ғылыми жобалар байқауларында жеңіске жеткендерге берілмек. Ол үшін мемлекеттік бюджеттен гранттар бөлінеді. "Болашақ" бағдарламасын кеңейту туралы норманы депутаттар қабылдады. Осылайша, жас таланттарды қолдау арқылы оларды елде ұстауға мүмкіндік туады дейді Мәжіліс депутаты, "AMANAT" фракциясының мүшесі Асхат Аймағамбетов.
АСХАТ АЙМАҒАМБЕТОВ, ҚР ПАРЛАМЕНТІ МӘЖІЛІСІНІҢ ДЕПУТАТЫ, "AMANAT" ФРАКЦИЯСЫНЫҢ МҮШЕСІ:
Әлемдік жетекші университеттер бұл талантты балаларға бірден бакалавриатқа гранттар ұсынатын, сол себепті олар шетелге кетіп қалатын. Сол кезеңде біз оларға дәл осындай қолдау көрсете алмадық, сондықтан оларды жиі жоғалтып отырдық. Көпшілігі шетелде оқумен қатар, сол жақта тұрақтап қалып жатты. Осындай балаларға мемлекеттік бюджет есебінен грант беру - маңызды қадам.
