Батыс Қазақстан облысында "Жер аманаты" бағдарламасы 171% орындалды. AMANAT партиясының облыстық филиалы сайлауалды бағдарламадағы уәдесін осылайша мерзімінен бұрын іске асырды. Биыл өңірде «Жер аманаты» бойынша пайдаланылмай жатқан және заңсыз алынған 50 мың гектар жерді кері қайтару жоспарланған. Партиялықтар бұл үшін әрбір ауданда көшпелі жиын өткізген. Жер иелері мен тұрғындарға бұл жобаның маңызы мен мақсатын түсіндіріпті. Осылай тынымсыз жүргізілген жұмыс өз нәтижесін беріп, екі жылдың ішінде 387 мың гектар жер мемлекет меншігіне қайтарылды. Ал соңғы екі жылдағы көрсеткіш күллі ел бойынша 11 миллион 500 мың гектарға жуық. Бұл жерлер кезінде ұстағанның қолында, тістегеннің аузында кеткен еді, дейді партиялықтар.
АЖАР НҰРАЛЫ, "AMANAT" ПАРТИЯСЫ БҚОФ БӨЛІМ МЕҢГЕРУШІСІ:
Жыл аяқталмай жатып жоспарды орындағанымызбен, біз алдағы уақытқа қойылған жұмыс әрі қарай жүргізіле береді. Өйткені кезінде заң басқа болды, келіспеушіліктер болды дегендей, сол кезде емін-еркін өз меншігіне иеленіп алған яғни, бүгінгі таңда пайдаланбай отырған шаруа қожалығы иелерімен жұмыстар жалғаса береді.
