Әлемде күн күрт суыды. Оңтүстік Кореяда екі күннен бері қар тоқтамай жауған. Салдарынан 5 адам қайтыс болды. Қытайда да жағдай осы. Жолдар жабылып, әуе рейстері кейінге қалдырды. Ал Ресейде төтенше жағдай жарияланды. Жердің түкпір-түкпіріндегі жаңалықтарды әріптесім Аружан Задабек айтсын. Эфирде «Жер-жаһан» айдары.
Қайырлы кеш, көрермен! Салқын даладан енді ғана үйге кіріп, шайға отырсаңыздар, мен жаңалығымды бастайын.
Солтүстік Кореяда ауа райы құбылып тұр. Тоқтамай жауған қардан зардап шеккендер көп. Тіпті, 5 адам өмірімен қоштасты. Үшеуі жол апатына түссе, екеуі қар тазалау кезінде көз жұмған. Ғимараттар қирап, опырылып жатыр. 93 әуе рейсі тоқтап, 18 тасжол жабылды. Елдің 15 аймағындағы тұрғындар жарықсыз отыр. Дәл қазір ақ ұлпаның қалыңдығы жарты метрге жеткен.
СО ЧОН ХЕ, ТҰРҒЫН:
Мен алғаш рет осындай қалың қарды көрдім. Бұл төтенше жағдай. Осы күнге дейін күн жылы болып тұрды. Тіпті, қалың киім алып үлгермедік. Бәрі аяқ асты болды.
Ресейдің қиыр шығысына да қалың қар түсті. Осыған байланысты елде төтенше жағдай жарияланған. Ақ ұлпа 3 күн бойы тоқтамай жауды. Мамандар мұндай боран соңғы 97 жылда болмаған дейді. Ал, Қытайда көктайғақ. Қазір жолдың барлығы жабылған. Елдің солтүстік-шығысында теміржол қатынасы мен құрылыс жұмыстары тоқтады. Мектептер уақытша жабық.
Өзге де жаңалықтарға ойысайық. Сербия астанасы Белградта шеру өтті. Жиналғандар өзара төбелесіп, соңы жаппай тәртіпсіздікке ұласты. Оппозиция өкілдері бұған дейін бірнеше рет көшеге шығып, сапасыз салынған нысандарға наразы екендерін осылай жеткізген. Ел үкіметін жемқор деп, орындарын босатуын талап етті. Бірақ биліктегілер мұны мойындамайды. Бәрін жоққа шығарған.
МАРИНИКА ТЕПИЧ, ОППОЗИЦИЯЛЫҚ ПАРТИЯНЫҢ ЗАҢ ШЫҒАРУШЫ ПРЕЗИДЕНТІ:
Үкіметті жақтаушылар бізді тепкілей бастады. Кейбіреулеріміз жарақат алдық. Полиция шақырдық. Олар жарты сағаттан кейін ғана келді. Енді сіз оның қалай көрінетініне куә болып отырсыз.
