Ақын, халықаралық «Алаш» әдеби сыйлығының иегері, Ханбибі Есенқарақызы 75 жаста. Қазақстан Республикасына еңбегі сіңген қызметкердің мерейтойы Шымкентте екі күн қатарынан кең көлемде аталып өтпек. Мейройтой шымылдығы жыр мүшәйрасымен түрілді.
Ханбибі Есенқарақызының 75 жылдығына арналған іс-шаралар тізбегі: «Ханбибінің биігі» деген атаумен жазба ақындар жыр мүшәйрасымен басталды. Жыр мүшайрасы ақынның шығармашылық болмысын кеңінен танытып, жас ақындардың поэзияға деген қызығушылығын арттыруды мақсат етеді. Бұл шараға еліміздің әр өңірінен келген үздік ақындар қатысуда.
«Ханбибінің биігі» атты республикалық жыр мүшәйрасы үш ай бұрын жарияланып, өлеңдер онлайн қабылданған. Оған еліміздің түкпір-түкпірінен 50-ге жуық ақындар қатысты. Жүлдегерлерді анықтау үшін елге есімі мәлім ақындар қазылық етті.
ҒАЛЫМ ЖАЙЛЫБАЙ АҚЫН, ҚАЗЫЛАР АЛҚАСЫНЫҢ ТӨРАҒАСЫ:
Ханбибі Есенқарақызы бұл - күллі Алаштың жүрегіне есімін жазған санаулы ақындардың бірі. Ханбибінің алғашқы өлеңдерінен бастап біз оқып өстік. Бүгінгі мейрам ең бірінші - өлеңнің мейрамы. Қазақтың биікке жеткен қызының мейрамы. Осы мейрамға жан-жақтан жиналып келіп тұрмыз. Бүгінгі шараның осылай басталуына өз басым ақын ретінде, азамат ретінде қатты қуанып тұрмын.
Шымкент қалалық Мәдениет, тілдерді дамыту және архивтер басқармасы ұйытқы болған ауқымды шаралар ақынның шығармашылығын кеңінен таныстырып, оның қазақ поэзиясына қосқан өлшеусіз үлесін насихаттауға бағытталған. Бұл кеште өлең де оқылды, ән де шырқалды. Мейрейтойға ақынның өзі де құралақан жетпегенін жеткізді.
ХАНБИБІ ЕСЕНҚАРАҚЫЗЫ, АҚЫН, ХАЛЫҚАРАЛЫҚ «АЛАШ» ӘДЕБИ СЫЙЛЫҒЫНЫҢ ИЕГЕРІ:
Күні кеше баспаханадан басылып шықты «Көктеммен қоштаспаған жаз» деген, бұл кітап әкімдіктің қолдауымен жарық көрді. Сондай-ақ, көрші халықтың классик жазушысы Назар Фазылдың «Еске алсаң көңілің жадырар» деген кітабын мен аударып, кітап етіп басып шығардым. Ол да бүгін қолыма тиді.
Ақынның мерейтойы екі күн қатарынан тойланбақ. Бүгін кешкісін Ханбибі Есенқарақызының «Сендегі мені өшірме» поэтикалық толғауының премьерасы қойылады. Ал ертең ауқымды шара «Хан қызындай Ханбибі» атты шығармашылық кешке ұласады. Одан бөлек ақынның сиясы кеппеген кітабының тұсауы салтанатты түрде кесіледі.
