Ауылға дәрігер болып барсаңыз 10 млн теңге беріледі. Атырау облысының әкімі Серік Шәпкенов осылай дейді. Қазір аймақта ақ халаттыларға барлық жағдай жасалған. Өңірде дәрігер тапшылығын жою мақсатында оларға берілетін бір реттік көмек былтырға қарағанда екі есе өскен.
Атырау облысында дәрігер мамандар жетіспейді. Алайда облыс әкімі кадр тапшы деп қол қусырып отырған жоқ. Өзге өңірден білікті және оқуын енді аяқтаған жас мамандарды тартып жатыр. Оларға бір реттік үстемақы тағайындалған. Нәтижесінде биыл 140 дәрігер жұмысқа қабылданды.
СЕРІК ШӘПКЕНОВ, АТЫРАУ ОБЛЫСЫНЫҢ ӘКІМІ:
Қалаға келіп жұмыс істейтін болса 5 млн, аудан орталығында болса 8 жарым млн, егер шалғай елдімекендерге барып қызмет атқаратын болса, дәрігерлерімізге 10 млн теңге көлемінде үстемақы беріп жатырмыз. Қазіргі таңда өңірімізде «Отбасы банкімен» бірлесе отырып, алғашқы жарнасыз 5 пайыздық мөлшерде несие беру программасын енгізген болатынбыз. Осы бағдарламаның аясында қазір 42 дәрігеріміз баспаналы болды.
Облыстың білім саласында да айтарлықтай жаңалық көп. Биыл аймақта 1200 және 300 орындық екі жайлы мектеп ашылды. Жыл соңына дейін тағы бір білім ордасының есігі айқара ашылмақ. Қазір мұнайлы өлкеде 20 мектеп пен 6 балабақшаның құрылысы жүріп жатыр. Аймақ басшысы өңірдегі өзекті мәселе үш ауысымды және апатты мектептер екенін атап өтті.
СЕРІК ШӘПКЕНОВ, АТЫРАУ ОБЛЫСЫНЫҢ ӘКІМІ:
Бұл жөнінде нақты жоспарымыз бар. Қазірдің өзінде біз 3 мектепті 4200 орындықты қолданысқа берген болатын болсақ, алдағы 2 жылда 27 мектепті беретін боламыз. Нәтижесінде 2027 жылға 9 үш ауысымдық және 4 апатты мектептің мәселесі түгелімен түбегейлі жойылатын болады.
Осылайша, алдағы екі жылда облыстағы апатты мектептердің мәселесі толығымен шешіледі. Сондай-ақ келер жылы 6 мектептің құрылысы аяқталады. 2026 жылға қарай тағы 3 білім ордасы пайдалануға беріледі.
