Оңтүстік Корея басшысы қызметтен кетуі мүмкін. Парламент қазір Президент Юн Сок Ёльді орнынан тайдыру туралы ұсынысты қарап жатыр. Енді Мемлекет басшысын қызметінен уақытша шеттетуге арналған дауыс беру тәулік ішінде өтуі мүмкін. Осы және өзге де ақпаратты әріптесім Аружан Задабек баяндайды. Эфирде – «Жер-жаһан» айдары.
Қайырлы кеш, көрермен! Расымен, кешегі түн Оңтүстік Корея Парламенті үшін ұйқысыз өтті. Алдымен даудың басы қайдан басталғанына тоқталайық. Ел Президенті әскери жағдай туралы хабарлағаннан кейін оған қарсы топ Мемлекет басшысын конституцияны бұзды және билікті тартып алмақ болды деп айыптады. Бұл бірінші жағдай емес. Бұған дейінгі басшылар да дәл осылай айыпталып, мерзімінен бұрын отставкаға кетуге мәжбүр болған.
ДЖОН ХАК-СЕОН, ЗАҢ МЕКТЕБІНІҢ ПРОФЕССОРЫ:
Қазір Оңтүстік Кореядағы саяси жағдай шиеленісті. Бірақ бұл төтенше жағдай немесе соғыс деңгейіне жетті деп айта алмаймыз. Мәселені мұқият қарау керек.
Ал, Конгода белгісіз вирус тарады. Көз жұмғандардың саны 143-ке жеткен. Әзірге дерттің қайдан пайда болғаны белгісіз. Белгілісі – ауру тұмауға ұқсайды. Науқастардың дене қызуы көтеріліп, басы қатты ауырады. Қазір арнаулы медициналық топ жұмыс істеп жатыр.
КРИС ГАРСИЯ, ШЕШЕК АУРУЫН БАҚЫЛАУ БӨЛІМІНІҢ БАСШЫСЫ:
Біз министрмен кездестік. Вакцина туралы ақылдастық. Оның зиян тұстары бар ма, жоқ па, осы сауалдарға жауап іздедік.
Малазияда да жұмбақ ауру тараған. Бұл елде жақында су тасқыны болды. Сонын салдарынан су арқылы тарайтын дерт пайда болыпты. Қазір жергілікті үкімет апат қайталануы мүмкін деп алаңдап отыр. Сондықтан қауіпті аймақта тұратын азаматтарды эвакуациялауды бастап кетті.
ШАХ ФЕЙСАЛ ХУССЕЙН, ЖАҺАНДЫҚ ОПЕРАЦИЯЛАР БӨЛІМІНІҢ БАСШЫСЫ:
Ауруды жұқтырғандар анықталды. Жедел жәрдем орталығына түскендер саны көп. Қазір біз медициналық топтарды жинап жатырмыз. Бұл әлі де жұмбақ. Іздену керк. Гигиена арқылы тараған дерт екені анық.
