Ақтөбеде Есет батыр атындағы олимпиада резерві облыстық мамандандырылған мектеп-интернат-колледжіндегі 8 сынып оқушысының өліміне қатысты сот үкімі шықты. Күдіктілердің бірі 9 жылға, екіншісі алты жыл 8 айға сотталды. Еске салайық, қайғылы оқиға биыл көктемде болды. 11 -сәуірде жоғарғы сыныптағылар 8 -сынып оқушыларын жинап, оларға тәрбиелік сағат өткізбек болған. Оларды сапқа тұрғызып, ұрып соққан. Ауыр соққыдан 14 жастағы жеткіншек көз жұмды. Осы оқиғадан кейін күдікті деп танылған екі жасөспірім қамауға алынды. Сот үш айға созылды. Сот жабық өтті.
ЕРЖАН ҚҰРМАНОВ, ОБЛЫСТЫҚ КӘМЕЛЕТКЕ ТОЛМАҒАНДАР ІСІ ЖӨНІНДЕГІ МАМАНДАНДЫРЫЛҒАН АУДАНАРАЛЫҚ СОТЫНЫҢ ТӨРАҒАСЫ:
Ақарыс Ысқақұлы Қалиев ҚК 28 бабы 3 бөлігімен , 106 бабы 3 бөлігімен қылмыстық құқықбұзушылық жасағаны үшін кінәлі деп танылсын. Оған 9 жыл мерзімге бас бостандығынан айыру жазасы тағайындалсын.
Ал екінші күдікті 6 жыл 8 айға сотталды. Жәбірленуші тарапқа сотталушылардан 20 миллион теңге көлемінде моральдық шығын өндірілмек. Алайда, сотталушылардың жақындары үкіммен келіспейтіндерін жеткізді.
