Болашағыңды болжаймын, кімнің саған қандай көзқараста екенін айтам. Әлеуметтік желіде астрологтар мен тарологтардың осындай жарнамасы көбейіп барады. Тіпті блогерлер де осы іске бет бұра бастаған. Айтып жүргендері рас па? Оған қоғам не дейді? Тілшіміз анықтап көрді.
Осындай жарнама желіде желдей есіп жүр. Сенетіндер де, сенбейтіндер де бар.
БЛИЦ-САУАЛНАМА:
- Жүріс-тұрысыма қарап, олар өз ойларын маған жеткізеді мысалы. Сондықтан сөйтіп рас деп ойлаймын.
- Егер сондай рас болды, сол шын болды, сондай болды-болды десе де мен сенбеймін. Себебі өтірік.
- Случайность деп есептейтін едім. Вообще сенбейм.
Болжам 90 процент жағдайда тура келеді, өйткені оның астарында математикалық талдау бар. Сыртқы факторды есептемегенде, жекелей адамға айтылған нәрселерде қателесу мүмкін емес. Тарологтар осылай дейді.
АНЖЕЛИКА ЛОБАНОВА, ТАРОЛОГ:
Бір қыздың жүктілік кезеңін болжағам, айтқаным айдай келді. Жақында сол қыз басқа оқиға бойынша тағы бір мәрте келіп кеңес алды. Жалпы оқиғаны кеңінен талдайтыны осы - таро. Бұл жерде жаңылу мүмкін емес. Тек кейде адамның айналасы біз-болжаған нәрсеге қарама-қайшы жолмен жүретіндіктен қателік болады. Яғни адамды қоршаған ортаға дөп болжам жасай алмайсың.
Осындай қызметтерге уайым, қорқыныш, мазасыздығы көбейген адамдар жүгінеді. Тіпті дәрігер, психологтарға осынша адам келмейді дейді Лимана Құттыбекқызы.
ЛИМАНА ҚҰТТЫБЕКҚЫЗЫ, ПСИХОЛОГ:
Ғылымнан бұрын, жаңағы изотерикаға көбіне сенеді. Біз адамның өзінің түсінуіне, түйсігінің оянуына себепкер боламыз да, сол жағы. Ал ол жерде мысалы изотериктер нақты жауап береді, сіз үшін жауап береді. Мысалы, сен емес кінәлі, ол, я болмаса ай мен жұлдыздың дұрыс келмеуінен сенің қазір басың ауырып тұр деген жауап ала алады ол жерде.
Карта аштырып, адамдардың сіз жайлы пікірін білу құны 5 мың теңгеден басталады. Алдағы ай мен жылды болжаймын десеңіз 20-30 мың төлейсіз. Қызметтің түр-түрі бар. Ертеңді білу дегенге дін өкілдері қарсы.
ЕЛБЕК ТАСБОЛАТҰЛЫ, ҚМДБ ШАРИҒАТ ЖӘНЕ ПӘТУА БӨЛІМІНІҢ МАМАНЫ:
Бұл шариғатта тыйым салынған дүние. Сондықтан осындай нәрселермен айналысатындар көбінесе күмәнді. Ол барынша шынымен қасиеті болса, әулиелігі болса ол барынша жасырады оны. Өйтіп мақтанатын да дүние емес. Сондықтан қазіргі көп кеңінен тарап жүргендер бұл шариғатқа қайшы, дінге қайшы, көбісі ол мұсылманшылықта да жоқ деп айтуға болады.
Сенсеңіз де, сенбесеңіз де ерік өзіңізде. Бастысы өткенге түсіп, ертеңге барып, осы күнді ұмытып кетпеңізші.
