Біріккен Ұлттар Ұйымының баспасөз хатшысы Стефан Дюжаррик Нью-Йорктегі штаб-пәтерінде өткен баспасөз мәслихатында қазір Сирияда 16 миллионнан астам адамның гуманитарлық көмекке мұқтаж екенін айтты. Бұл туралы БҰҰ баспасөз қызметі мәлім етті.
Ұйымның баспасөз хатшысы азық-түлік және санитарлық-гигиеналық заттардың тез арада қажет екенін атап өтті.
Стефан Дюжарриктің айтуынша, кейбір азаматтық мүліктер мен зауыттар, гуманитарлық заттарды сақтайтын қоймалар талан-таражға түскен. Ол қиындықтар мен тұрақсыз жағдайға қарамастан, Біріккен Ұлттар Ұйымы мен оның серіктестері шұғыл көмек көрсетуді жалғастыратынын атап өтті.
Сирияның солтүстік-батысындағы, Идлиб пен Алеппоның солтүстік облыстарындағы барлық гуманитарлық ұйымдар жұмысын қайта жандандырды. Біріккен Ұлттар Ұйымы Түркиядан Сирияға көмек жеткізу үшін пайдаланған үш шекара бекеті әлі ашық. БҰҰ Сирияның солтүстік-шығысында жақында Алепподан қашып келген адамдарға көмек көрсетіп жатыр.
Солтүстік-батыста жұмысын тоқтатқан барлық 24 денсаулық сақтау мекемесі жұмысын қайта бастады.
Біріккен Ұлттар Ұйымы барлық тарапты миллиондаған сириялық босқындардың отандарына аман-есен оралуы үшін тиімді қолдау көрсетуге шақырады.
