Бүгін тыл және еңбек ардагері, елордалық Қабжан Біләлов 90 жасқа келді. Әрі жұбайы Қапиза Құсайыновамен отау құрғандарына 70 жыл толды. Қуанышқа орай қос қарияны ұл-қыз, немерелері мен құтты қонақтар құттықтап келді.
Екі ғасырдың куәсі болған жандар қаршадайынан ауыр жұмысқа араласып, тылда еңбек етті. Бірі шопан-бақташы, бірі көмекші боп, соғыс ауыртпашылығының бір шетін арқалады. Жарғақ құлағы жастыққа тимей, күн-түн сарыла еңбек етті. Сөйте жүріп, таза сезімнің жылуымен жағылған ошақ отын сөндірмей, балаларына қамқор ата-ана болды.
МАРАТ МҰСТАФИН, АЛМАТЫ АУДАНДЫҚ АРДАГЕРЛЕР КЕҢЕСІНІҢ ТӨРАҒАСЫ:
Анамызбен екеуі 9 бала өсірген. Анамыз халықтың геройы қарап отырсаңыздар. 24 немере бар, 21 шөбере бар. Оның үстіне атамыз талай медаль алған.
Қабжан ақсақалдың 3 жасында әкесі қуғынға ұшырап, жазықсыз репрессия құрбаны болған. Қария ел-жерге адал қызмет ете жүріп, тың игеруде һәм мал шаруашылығында бірталай жетістікке жеткен.
ҚАБЖАН БІЛӘЛОВ, ТЫЛ ЖӘНЕ ЕҢБЕК АРДАГЕРІ:
90-ға келіңдер, 100-ге келіңдер, өмірлерің ұзақтан, көңілдерің ақтан болсын. Алдың береке, артың мереке болсын. Бақ-дәулет берсін бастарыңа, ғұмыр берсін жастарыңа, пәле-жала жоламасын қатсарыңа.
Қарияның жары Қапиза кейуананың жасы 88-де. Отағасымен бірге бейнет пен зейнетті қатар көргенін күлімдей еске алады.
ҚАПИЗА ҚҰСАЙЫНОВА, ТЫЛ ЖӘНЕ ЕҢБЕК АРДАГЕРІ:
Екеуіміз де еңбек еттік бірге. Қарға жамылдық, қысқа тоңдық дегендей. Аш та, жалаңаш та жүрген уақытымыз болды. Біздің бастамамыз соғыстың аяқ кезі ғой. Ол кезде нан да жетіспейді мысалы, тамақ та бірде бар, бірде жоқ. Соның бәрін жеңіп, осындай жақсы өмірге кездесіп, ақсақалменен.
Елдің қазынасына айналған қос қария жатсақ та, тұрсақ та заман мен елдің тыныштығын ғана тілейміз дейді.
