Биыл Ақтау қаласына 300 мыңнан астам турист келген. Бұл былтырмен салыстырғанда 7 пайызға артық. Сондай-ақ қалада балаларға арналған ойын және спорт алаңдары көбейіп жатыр. Шаһарда жылу беру жағдайы жақсарып келеді. Бұл туралы Ақтау қаласының әкімі халыққа есеп беру кезінде айтты.
Биыл Ақтау қаласында 8 инвестициялық жобаны жүзеге асыру жоспарланған. 7 жоба іске қосылды. Енді біреуі жылдың соңына дейін аяқталады. Сондай-ақ шаһарда қазан айынан бері шағын аудандардың біріне 905 метр кәріз және су құбыры тартылған. 11 шақырымнан астам магистральдық жылу желілерін қайта жаңғырту жұмыстары жүргізілді. Тұрғын үйлерде 493 автоматтандырылған жылу пункті орнатылған. Жиын барысында Президент резиденциясы жек меншікке өтіп кеткен деген уәж айтылды.
ТҰРҒЫН:
Бізде Ақтауда Самалда тұр, резиденциямыз. Сол қаладағы балаларға берілген. Балаларға демалатын жерлерді жасаңдар деп айтылған. Сөйтсе ол жер оның жеке меншігіне өтіп кеткен.
НҰРДӘУЛЕТ ҚИЛЫБАЙ, МАҢҒЫСТАУ ОБЛЫСЫНЫҢ ӘКІМІ:
Білмейтін нәрсені айтып тұрсыз, сіз. Резиденция жекеменшікке өтіп кетті деп. Дәлеліңіз бар ма көрсетіңіз. Жоқ па олай өтірік айтпаңыз. Осындай сіз сияқты кісілердің кесірінен халық соған сенеді. Мына жерде сіздерге айтайын, ешкімнің қолына кеткен жоқ. Ол резиденция Ақтау қаласы әкімінің құзырына кірді.
Аталған аумақта стадион, мешіт, балалар ойын алаңдары мен жағадағы туризмді дамытуға бағытталған жобалар жүзеге асатын болады. Қазір тұрғындарға қолайлы жағдай жасау мақсатында бірнеше мектеп маңында жолды кеңейту, көлік тұрақтарын реттеу жұмыстары жүргізілуде.
