Қазір елімізде 1 млн 500 мың халық тұратын 800 ауыл 17 мың шақырымды құрайтын 80 топтық су құбыры есебінен тіршілік нәрімен қамтылған. Министрлік тағы 9 облыста 32 жобаны жүзеге асыруда. Ал бесеуінің жобалық-сметалық құжаттамасы әзірленіп жатыр. Тиісті қаржы бөлініп, мердігерлер жұмысты жедел аяқтаса жылдың соңына дейін 8 жоба аяқталады. Нәтижесінде 208 мың тұрғыны бар 49 елдімекен тіршілік нәріне қол жеткізеді. Оған биыл 50 млрд теңге бөлініпті. Бұл туралы «AMANAT» партиясы жанындағы Өңірлік даму жөніндегі республикалық кеңесте айтылды.
БЕРІК БЕЙСЕНҒАЛИЕВ, ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Бүгін кезекті рет «Ауыз судың сапасы мен халыққа қолжетімділігін қамтамасыз ету» мәселесін талқылауға жиналдық. Халықты сапалы ауыз сумен қамтамасыз ету тек инфрақұрылымдық міндет емес. Бұл ұлт денсаулығы. Біз прогресті көріп отырмыз. Қаланың 98,9% сумен қамтылған. Ал ауылдарда-96,6% . Мемлекет басшысы 2025 жылдың соңына дейін барлық жер 100 процент тіршілік нәрімен қамтамасыз етілуі тиіс деді. Біздің осы алаңға жиналуымызға осы себеп. Бірігіп мәселелерді талқыладық.
