Астанадағы Жастар сарайы 50 жылдық мерейтойын атап өтті. Жарты ғасырлық тарихы бар өнер ордасы өзіне тән мәнерде шығармашылық шыңына шыққан жандардың басын қосып, қала тұрғындарының ыстық ықыласына бөленді.
Ерекше орданың мерейтойына келіп, қуанышқа куә боламын дегендер көп болды. Жастар сарайының қала тынысы үшін маңызы айтпаса да түсінікті. 50 жыл бойы Елорданың спорттық, бастысы мәдени қара шаңырағына айналған мекеннің мерекесі де, көпшілікті мәз-мейрам етті. Ән-мен күй, би мен қойылым – сарайдың сарқылмас қазынасы, - дейді қонақтар.
ЖАҢАБАЙ МЕЙІРМАНҚҰЛОВ, ҚАЛАЛЫҚ МӘДЕНИЕТ БАСҚАРМАСЫНЫҢ БАСШЫСЫ:
Жастар сарайы қаланың мәдени және спорттық дамуына үлкен үлес қосып жатыр. Өздеріңіз білетіндей, жастар сарайында концерттік залдан бөлек, спортпен шұғылданатын бассейн бар және спорттық үйірмелер бар. Сондықтан, менің ойымша жастар сарайының атқарып жатқан жұмысы орасан-зор.
Жастар сарайының аты айтқандай, мұнда келген кішкентай бүлдіршін, нағыз дарынды өнер адамы болып шығады. Кеңес Одағы кезінде өнер жолын бастаған аға буын өкілдері қазір елге белгілі тұлғаға айналған.
РУСТАМ АМИРОВ,«ЖАСТАР» САРАЙЫ «ЖІГЕР» ЭСТРАДА-ДЖАЗ АНСАМБЛІНІҢ ЖЕТЕКШІСІ:
Жастар сарайында мен жас кезімде 85-і жылдан бері студент кезімде жұмыс істей бастадым. Осы жерден үлкен өнерге алғашқы қадамымды жасадым. Басты айтарым, бұл – расымен, жастардың үйі. Ұлағатты дәстүрді жалғап, ұрпақтар сабақтастығын жалғаған бірден-бір жер деп айта аламын. Осы жерден қаншама әртіс, әнші, биші мен спортшылар шықты.
Белгілі продюссер Алтын Махамбет те Жастар сарайында болашақ өнерпаздарды дайындаумен айналысып жүр. Осы өнер ордасына келген балаларды шыңдап шығару – басты міндетіміз, - дейді майталман.
АЛТЫН МАХАМБЕТ, «ЖАСТАР» САРАЙЫ БАЛАЛАР ШЫҒАРМАШЫЛЫҚ ҰЖЫМЫНЫҢ ЖЕТЕКШІСІ:
Балалар келіп жатыр. Негізгі мақсатымыз – балалардың әндерін дамыту мен насихаттау. Балаларды дұрыс өмірге, әсемдікке және құштарлыққа баулу және рухани бай, жан-дүниесі бай азамат тәрбиелеп шығару.
Өнер мекенінің мерейтойында қуанышпен бөлісіп, құттықтауға елге еңбегі сіңген белгілі қайраткерлер келді. Солардың қатарында танымал актер – Ерік Жолжақсынов та бар. Оның айтуынша, Жастар сарайының аты Қазақстанда ғана емес, жақын шетелде де абыройға ие.
ЕРІК ЖОЛЖАҚСЫНОВ, КИНО ЖӘНЕ ТЕАТР АКТЕРІ:
Жалпы, жастар сарайы – өнердің ұйытқысы. Әр жерден келген жастардың жұлдызын ашу үшін де, бүлдіршіндердің алғаш қадам жасауы үшін де қаншама конкурстар болды. Ұлы біздің композиторлардың мерейтойы өтті.
Ағайынды Даниял мен Әлихан жастар сарайында тәлім алып жүрген жаңа буын өкілі. Екеуі де вокалмен қатар, бірнеше аспапта ойнауды меңгерген.
ДАНИЯЛ РАХЫМ, ОҚУШЫ:
Керемет. Бұл жерде көп үйірмелер бар. Спорт пен ұлттық ойындар бар. Көп үйірмелер бар.
ӘЛИХАН РАХЫМ, ОҚУШЫ:
Өзіме вокал ұнайды. Өйткені мен Жастар сарайында бірінші өзімді көрсете бастаған өнерім – вокал. Ең бірінші симфоникалық оркестрмен осы жастар сарайында өз деңгейімді көтердім.
Бидің биік белесі мен әсем әннің әр алуан жанрлары көрсетілген мерейтойлық шығармашылық кеш біраз уақытқа дейін аяқталмады. Көрермен ұзақ уақыт көзайымына айналған сахна майталмандарын жібергісі келмей, тағы бір шырқауын қайталай сұрай берді.
