Семейде 21 жанұя жаңа баспанаға ие болды. Пәтер кілті ата-анасының қамқорлығынсыз қалған және әлемеуметтік осал топ санатындағы отбасыларға табысталды. Салтанатты шара Тәуелсіздік күні қарсаңында өтті. Көпшілік көптен күткен қуанышты сәт туралы толығырақ тілшіміз тарқатады. Жиналғандардың қуанышында бүгін шек жоқ. Өйткені көптен бері кезекте тұрған пәтерлеріне қолы жетті. Қуанышқа қала әкімдігі мұрындық болған.
НҰРБОЛ НҰРСАҒАТОВ, ҚАЛА ӘКІМІ:
Жыл басынан бері өздеріңіз білесіздер, біз 400-ге тарта пәтерлердің кілтін тапсырдық. Бұл енді мемлекетіміздің президенті Қасым-Жомарт Кемелұлы Тоқаевтың қолдауымен, облыс әкімінің қолдауымен істеліп жатқан игі шара. Бүгіннің өзінде біз 21 отбасыға пәтерлерінің кілтін табыс етеміз. Және де жылдың аяғына дейін тағы да 29 пәтердің кілтін табыстауға жоспарымыз бар. Ол 29 пәтерде қазір әрлеу-әктеу жұмыстары жүргізіліп жатыр. Сондықтан да барлығыңыздың қоныстарыңыз құтты болсын!
Қалада 14-мыңға жуық адам мемлекеттік тұрғын үй қорынан баспана алуға кезекте тұр, оның 1731-і – көпбалалы отбасы. Жылы да жайлы пәтерге қоныстанғандар да осы күнді ұзақ жыл күтіпті.
СӘУЛЕ ЖЕЛДІБАЕВА, ҚАЛА ТҰРҒЫНЫ:
12 жыл күткен баспанамызға қол жеткізіп отырмыз. Аллаға сансыз шүкір, қуанышымызда шек жоқ. Мен жалғызбасты боп осы тіркеуге тұрғаныма 12 жыл болды. Міне бүгін ғана сол күнге жетіп отырмыз. Әкімшілікке көптен көп рақмет! Мемлекет тарапынан көпбалалы жәрдемақыны алам, содан кейін сол мүгедек баламның ай сайынғы жәрдемақысын аламыз.
Семейде соңғы жылдары құрылыс қарқыны айтарлықтай артып, көптеген тұрғын үй бой көтеріп келеді. Жыл басталғалы халықтың әлеуметтік осал топтары мен бюджеттік сала қызметкерлеріне 352 пәтер берілді.
