16 желтоқсан күні сағат 15:15 шамасында Қарасу ауданының Герцено елді мекенінен 10 шақырым жерде "Қостанай-Әулиекөл-Сұрған" тас жолында Volvo және Toyota Alphard көліктері соқтығысып, жол апаты болды. Бұл туралы Stan.kz ақпарат агенттігі Qostanai.media порталына сілтеме жасап хабарлайды.
Жүк көлігінің жүргізушісі Түркістан облысының 1992 жылғы тұрғыны. Ал такси жүргізушісі Шалғышы ауылының 1982 жылғы тұрғыны екені анықталды. Қатты апаттың салдарынан үш жолаушы алған жарақаттарынан оқиға орнында көз жұмды. Тағы үшеуі Әулиекөл аудандық ауруханасына жеткізілді. Олардан кейін облыстық мамандандырылған медициналық мекемелерге жіберілді. Зардап шеккендердің арасында 11 жасар ұл бала бар, ол анасымен бірге болған. Баланың қолдары мен аяқтарында жарақаттар мен кесілген жерлер бар. Анасы да жарақат алған.
Қайғылы оқиғада қаза тапқандардың арасында білім саласының қызметкерлері де бар. Олардың екеуі бұрын Октябрь орта мектебінде жұмыс істеген. Заречная мектеп-лицейінің 35 жастағы орыс тілі мен әдебиеті пәнінің мұғалімі Карина Лаврик пен Большe-Чураков орта мектебінің 48 жастағы педагог-психологы Луиза Ашаева да қайтыс болды. Бұл тәжірибелі педагогтар туралы әріптестері тек жақсы пікірлер айтты.
"Бұл ауыртпалықты сөзбен жеткізу мүмкін емес... Карина Сергеевна 2015 жылға дейін бізде жұмыс істеді. Ал Луиза Леонидовна екі жыл бұрын отбасылық жағдайлармен басқа жерге қоныс аударған еді. Өмірден тамаша әйелдер кетіп қалды. Олар керемет ұстаздар болды. Білімді, өте мейірімді, әріптестері мен оқушылары арасында үлкен беделге ие еді. Олар өз жұмысын сүйіп, оған бар жан-тәнімен берілген. Көптеген идеяларға толы және оларды жүзеге асыруға талпынатын жан еді. Бұл қазаны түсіну өте қиын... Сенбейсің... Қорқынышты қайғы”, – деп көңіл айтады Октябрь ауылындағы білім мекемесінің ұжымы.
Мерт болған Алина Абрамова 2002 жылы туған Целинное ауылынан шыққан. Сондай-ақ педагог болған. Қостанай педагогикалық колледжінде оқып, кейін қашықтықтан жоғары оқу орнында білім алған Алина "Әйгерім Ай" атты гуманитарлық бағыттағы жеке мектепте жұмыс істеді.
Білім ордасының басшысы Құралай Шодорова мұғалімді тек жақсы жағынан сипаттайды.
"Бұл өте үлкен қаза. Біздің ұжымымыз қатты қайғырып отыр. Ол тамаша адам, керемет ұстаз еді. Алина бізде бар болғаны үш жыл жұмыс істеді, бірақ осы уақыт ішінде ұстаз ретінде көп жетістікке жетті. Ұжымда оны бәрі құрметтейтін, балалар мен ата-аналар оны жақсы көретін. Ол бейнелеу өнері пәнінің мұғалімі ретінде балалармен де, ата-аналармен де жұмыс істей алатын. Дарынды балаларды тауып, олардың талантын дамытуға ата-аналарды сендіру қабілетіне ие еді. Біздің Алина – жас маман ретінде өте үлкен жауапкершілік пен тамаша табиғи қабілеттерге ие ерекше адам. Мектепте аза тұту жарияланды, барлық ұжым мен 1-сынып оқушыларының ата-аналары осы дарынды әрі жарқын қызды соңғы сапарға шығарып салу рәсіміне міндетті түрде қатысады. Бұл біз үшін барлығымызға трагедия... Жақындары мен туыстарына көңіл айтамыз", – деді Құралай Шодорова.
