Түнде Солтүстік Қазақстан облысында 8 адам құтқарылды, деп хабарлайды BAQ.KZ Төтенше жағдайлар министрлігіне сілтеме жасап.
ТЖМ құтқарушылары жаңа техниканың көмегімен екі құтқару операциясын сәтті жүргізді. Өңірде ауа-райының нашарлауына және қалың қардың түсуіне байланысты көліктер жолдарын жалғастыра алмай, жүргізушілер құтқарушылардың көмегіне жүгінуде.
Бірінші ретте Уәлиханов ауданында қар құрсауында дала жолында қалып қойған жеңіл көлік жолға шығарылып, көлік салонында болған 5 адам құтқарылды. Екіншісінде Есіл ауданында жеңіл көлік жүргізушісі рульді басқара алмай, жол жиегіне түсіп кеткен. Бұл жолы көлік арқан арқылы жолға сүйретіліп, 3 адам құтқарылды, - делінген ведомство таратқан хабарламада.
ТЖМ дауылды ескертулерге назар аударып, ауа-райы нашарлаған жағдайда елді мекеннен тыс жерге жолға шықпауға кеңес береді.
